सोमालिया, १८ साउन । सोमालियामा खडेरीका कारण विस्थापित वन्ने सोमालियाली नागरिकको सङ्ख्या सात लाख ६६ हजार ४६७ पुगेको मङ्गलबार संयुक्त राष्ट्रसङ्घले जनाएको छ ।

संयुक्त राष्ट्रसङ्घ मानवीय सहायता मामिला हेर्ने संस्था (ओसिएचए) ले आफ्नो पछिल्लो प्रतिवेदनमा भनेको छ, “ विस्थापितमध्ये सबैभन्दा धेरै सोमालियाली नागरिक अर्थात् एक लाख ७७ हजार व्यक्तिलाई बायोडोआस्थित विभिन्न बस्तीहरूमा राखिएको छ भने एक लाख ६१ हजार मानिस मोगादिशुका विभिन्न वस्तीमा शरण लिइरहेका छन् ।

विस्थापित नागरिकलाई वास र गैर खाद्यान्न सामग्रीको आवश्यकता परेको छ । लगातार विस्थापित जनसङ्ख्यालाई खाद्यान्न तथा पोषणजन्य सामग्रीको आवश्यकता रहेको पनि ओसिएचएको सोमबार सार्वजनिक प्रतिवेदनमा जनाइएको छ ।

विस्थापितमध्ये बेबाट एक लाख ९७ हजार, लोअर साबेलेबाट एक लाख ३९ हजार, मुदुगबाट एक लाख र सुल क्षेत्रबाट ६० हजार नागरिक रहेको उनीहरू खडेरीबाट नराम्ररी प्रभावित बनेका राष्ट्रसङ्घको ठहर छ ।

त्यसैगरी झण्डै एघार लाख नागरिक विस्थापित हुने अवस्थामा रहेका पनि बताइएको छ ।

विस्थापित बनेर ठूलो सङ्ख्यामा राष्ट्रसङ्घको शिविरमा पुगेका नागरिकलाई खानेपानी, औषधि, खाद्यान्न, लुगाफाटो र चर्पीजस्ता सामान्य आवश्यकतालाई पनि पुरा गर्न धौ धौ पर्ने गरेको पनि देखिएको राष्ट्रसङ्घका प्रतिनिधिले बताएका छन् । रासस