काठमाडौ ३० भदौ । नेपाल मिडिया सोसाइटीले यही भदौ २३ र २४ गते जेन–जी आन्दोलनको क्रममा भएको सञ्चारगृहलगायत सार्वजनिक, निजी र विभिन्न क्षेत्रमा भएका आगजनी, तोडफोड लुटपाटका घटनाहरुप्रति निन्दा गरेको छ ।

मंगलबार नेपाल मिडिया सोसाइटीका अध्यक्ष मदन लम्सालद्वारा जारी विज्ञप्तिमा उक्त घटनामा स्वतन्त्र, निष्पक्ष र पारदर्शी अनुसन्धान गरि दोषीमाथि कारबाही गर्न जोडदार माग गरिएको छ ।

देशमा बढेको कुशासन र भ्रष्टाचारका विरुद्ध आवाज उठाउँदै युवापुस्ताको समूह जेन–जी ले २०८२ भदौ २३ गते आव्हान गरेको आन्दोलनमा अत्याधिक बल प्रयोगका कारण ज्यान गुमाउने सम्पूर्ण व्यक्तिहरूमा नेपाल मिडिया सोसाईटी हार्दिक श्रद्धाञ्जली अर्पण गर्दै शोक सन्तप्त परिवारप्रति समवेदना व्यक्त गर्दछ । साथै प्रदर्शनका क्रममा भएको हिंसात्मक घटनाहरूको निन्दा गर्दै सञ्चारगृहमाथि भएको आक्रमणप्रति गहिरो दुःख व्यक्त गर्दछ । प्रदर्शनको मौका छोपेर अपरााधिक समूहले पत्रकार र सञ्चारकर्मीमाथि गरेको कुटपिट र सञ्चारगृहमा भएको तोडफोड तथा आगजनीप्रति नेपाल मिडिया सोसाइटी घोर भत्र्सना र निन्दा गर्दछ ।
नेपाल मिडिया सोसाईटीले पूर्ण प्रेस स्वतन्त्रता तथा नागरिको अभिव्यक्ति स्वतन्त्रताको सधै पैरवी गर्दै आएको छ । साथै निजी सम्पत्तिको संरक्षण गरिनु पर्ने संवैधानिक हक कोही कतैबाट अपहरण गरिनु हुँदैन भन्नेमा सोसाईटी दृढ छ । प्रदर्शनका क्रममा कान्तिपुर दैनिक,कान्तिपुर एफएम तथा कान्तिपुर टिभीको कार्यालय जलेर पूर्णरुपमा नष्ट भएको छ । त्यस्तै अन्नपूर्ण दैनिक र एपी वान टिभीको कार्यालयमा आगजनी गरिएको छ । साथै निजी र सार्वजनिक सम्पत्तिमाथि भएको तोडफोड र क्षतिको सासाइटीे निन्दा गर्दछ ।
प्रदर्शनका क्रममा सन्चारगृह, औद्योगिक प्रतिष्ठान, व्यक्तिका निजि निवास सार्वजनिक भवन तथा सञ्चारकर्मीमाथि गरिएका सबै प्रकारका आक्रमण तथा लुटपाटका घटनाहरूको स्वतन्त्र, निष्पक्ष र पारदर्शी अनुसन्धान गरि दोषीमाथि कारबाही गर्न र क्षतिपूर्तिको व्यवस्था गर्न नेपाल मिडिया सोसाईटी सरकार संग जोडदार माग गर्दछ ।