काठमाडौं, १८ साउन। नेपालमा उत्पादित रेड बुल एनर्जी ड्रिंकले रेड बुल नेपालले आईएसओ प्रमाणपत्र पाएको छ । सरस बेभरेजद्वारा सञ्चालित अमरापुरीस्थित अत्याधुनिक उत्पादन केन्द्रले अन्तर्राष्ट्रिय खाद्य सुरक्षा व्यवस्थापन प्रणालीको मापदण्ड पुरा गर्दै यो प्रतिष्ठित प्रमाणपत्र हासिल गरेको हो। यो उपलब्धिले रेड बुल नेपाललाई गुणस्तरीय उत्पादन, उपभोक्ता सुरक्षाप्रति प्रतिबद्धता र पारदर्शिताको प्रतीकका रूपमा थप विश्वसनीय बनाएको छ।

ISO 22000:2018  प्रमाणिकरणले रेड बुल उत्पादनमा प्रयोग हुने कच्चा पदार्थको छनोटदेखि अन्तिम प्याकेजिङसम्मका सम्पूर्ण प्रक्रिया अन्तर्राष्ट्रिय मापदण्डअनुसार सञ्चालित रहेको पुष्टि गर्छ। कम्पनीका अनुसार, यस प्रमाणपत्रले उपभोक्तालाई हरेक क्यानमा ढुक्क भएर पिउन सकिने भरोसा दिन्छ।

रेड बुल एनर्जी ड्रिंक सरस बेभरेजको स्वामित्वमा नेपालमै उत्पादन हुँदै आएको छ। अमरापुरीस्थित उत्पादन केन्द्र पूर्ण स्वचालित, अत्याधुनिक प्रविधियुक्त, र वातावरणीय सुरक्षामा उच्च मापदण्ड पालना गर्ने सुविधा हो।

“ISO 22000 प्रमाणपत्र प्राप्त गर्नु हाम्रो खाद्य सुरक्षा तथा उत्पादन गुणस्तरप्रतिको गहिरो प्रतिबद्धताको प्रमाण हो”, सरस बेभरेजका प्रबन्ध निर्देशक सुरेन्द्र सिलवालले भने, “हामी गौरवान्वित छौं कि हाम्रो अमरापुरीस्थित कारखानाले अन्तर्राष्ट्रिय मापदण्डअनुसार मात्र होइन, त्यसभन्दा माथि उठेर खाद्य सुरक्षा, उत्पादन गुणस्तर, र सञ्चालन दक्षतामा उत्कृष्टता हासिल गरेको छ। यस उपलब्धिले नेपालमा रेड बुललाई अझ विश्वासिलो, उच्च-गुणस्तरीय र विश्वसनीय ब्रान्डका रूपमा स्थापित गरेको छ।”

ISO 22000 प्राप्त गरेसँगै, नेपाल अब रेड बुल उत्पादन गर्ने विश्वका पाँच मुलुकमध्ये एक बनेको छ। यसले नेपालमा रोजगारी र औद्योगिक वृद्धिमा टेवा पुर्‍याउनेछ, तर नेपाल–थाइल्याण्डबीचको व्यापारिक सहकार्यलाई पनि मजबुत बनाउने अपेक्षा गरिएको छ।

कम्पनीले उक्त प्रमाणिकरणलाई आगामी ब्रान्डिङ, विज्ञापन र उपभोक्ता संवादहरूमा प्रमुख रूपमा प्रस्तुत गर्ने योजना बनाएको जनाएको छ।