काठमाडौं, १८ चैत । नेपाल उद्योग परिसंघको अध्यक्ष हरिभक्त शर्माले नेपालीले विदेशमा लगानी गर्न नपाएकाले गैरकानुनी ढंगबाट पूँजी पलायन भईरहेको बताउनुभएको छ ।

एबीसी टेलिभिजनको कार्यक्रम बिज टकमा कुराकानी गर्दै अध्यक्ष शर्माले विदेशमा लगानी गर्न पाउनुपर्ने कानुन नबन्दा नेपालबाट पूँजी बाहिर गईरहेको बताउनुभएको हो । सरकारले कानुनी बाटो नखोलिदिंदा सम्म पूँजी पलायन भईरहने उहाँको भनाई छ । उहाँले भन्नुभयोर्, हामीले बारम्बार सरकारलाई भन्दै आएका छौं विदेशमा लगानी गर्ने कानुन चाहियो भनेर यो नबन्दा सम्म पूँजी पलायन कसैले पनि रोक्न सक्दैन । पूँजी पलायन हुने देशहरुको सुचीमा नेपाल चौथो स्थानमा पुगेको छ ।’

नेपालको कानुन अनुसार नेपालीले बाहिर अरु देशमा लगानी गर्न पाउँदैनन् । लगानी गरेपनि त्यो गैरकानुनी मानिन्छ । नेपालमा कि त सरकारले लगानी सुरक्षित गर्ने वातावरण बनाईदिनुपर्ने कि त विदेशमा लगानी गर्न पाउनुपर्ने कानुन ल्याईदिनुपर्ने अध्यक्ष शर्माको माग छ ।

आर्थिक समृद्धिको दिशामा सरकारलाई सधैं साथ दिन निजी क्षेत्र तयार रहेको उहाँको भनाई छ । अहिलेको सरकारप्रति आफूहरु विश्वस्त रहेको भन्दै उहाँले आर्थिक विकासको बाटोमा कर्मचारी प्रशासनलाई सुधार्नुपर्ने बताउनुभयो । उहाँले भन्नुभयो, “हामी वामपन्थी सरकारलाई पुरा विश्वास गर्छौं तर सरकारले जति सुकै राम्रा कार्यक्रमहरु ल्याएपनि कर्मचारीतन्त्रलाई सुधार्न सकेन भने सरकार असफल हुन सक्छ । काममा ढिलाई हुने जुन प्रवृत्ति छ त्यसलाई हटाउनु जरुरी छ ।”

अध्यक्ष शर्माले नेपालको अर्थव्यवस्था पूँजीवाद हुँदै सामन्तवाद तर्फ उन्मुख हुनुपर्ने बताउनुभयो । नेपालको अर्थतन्त्र समस्यामा पर्दै गईरहेको छ भन्ने कुरा आफूहरुले पाँच वर्ष अघिदेखि भन्दै आएपनि अहिलेको सरकारले यो कुरा बुझेकोमा उहाँले धन्यवाद दिनुभयो । नेपालको कानुनी जटिलताले स्वदेशी र विदेशी लगानी बढ्न नसकेको उहाँको भनाई छ ।

परिसंघका अध्यक्ष हरिभक्त शर्मासँग गरिएको कुराकानीका लागि यो भिडियो हेर्नुहोला-