काठमाडौ ७ असार । इजरायलले शनिबारको आक्रमणमा इरानका एक वरिष्ठ कमान्डर मारिएको दाबी गरेको छ।

इजरायका रक्षामन्त्री इजरायल काट्जले शनिबार इरानी सहर कोममा रहेको एक आवासीय भवनमा आईडीएफले गरेको हमलामा इरानको शक्तिशाली कुड्स फोर्सका सदस्य सईद इजादी मारिएको दाबी गरेका हुन्।

कुड्स फोर्स इस्लामिक रिभोलुसनरी गार्ड कोर्प्स आईआरजीसी को एक शाखा हो। तर इजादी मारिएको दाबीमा आईआरजीसीले अहिलेसम्म कुनै प्रतिक्रिया दिएको छैन।

इजरायलका रक्षामन्त्री काट्जले भने सईद इजादीले ७ अक्टोबर २०२३ मा इजरायलमा हमासको आक्रमणलाई आर्थिक सहयोग गरेको आरोप लगाएका छन्।

उनले भने, ‘यो इजरायली गुप्तचर विभाग र वायुसेनाका लागि ठूलो उपलब्धि हो। हत्या गरिएका मानिस र बन्धकका लागि न्याय हो। इजरायलको लामो हात आफ्ना सबै शत्रुसम्म पुग्छ।’

जुन १३ देखि इरान र इजरायलबीच युद्ध जारी छ। एकअर्काविरुद्ध हवाई हमला गरिरहेका छन्।