काठमाडौ ३० जेठ । आईसीसी विश्व टेस्ट च्याम्पियनशिपअन्तर्गत फाइनल खेलको दोश्रो दिनको खेलमा अस्ट्रेलियाले दुई सय १८ रनको अग्रता लिएको छ । बेलायतको लड्र्स क्रिकेट मैदानमा दोस्रो दिनको खेल सकिंदा अस्ट्रेलियाले आफ्नो दोस्रो पारी शुरु गर्दै आठ विकेट गुमाएर एक सय ४४ रन बनाएको छ । नथान लियोन एक र मिचेल स्टार्क १६ रन बनाएर खेलिरहेका छन् ।

त्यसअघि दक्षिण अफ्रिका आफ्नो पहिलो पारीमा एक सय ३८ रनमै अलआउट भयो । पहिलो दिन पूर्व विजेता अस्ट्रेलिया दुई सय १२ रनमा अलआउट भएको थियो । दक्षिण अफ्रिका ६९ दशमलव ४४ प्रतिशत र अस्ट्रेलिया ६७ दशमलव ५४ अङ्कका साथ फाइनलमा पुगेका हुन् ।

यो संस्करणको विजेताले ३ दशमलव ६ मिलियन अमेरिकी डलर र उपविजेताले २ दशमलव १६ मिलियन अमेरिकी डलर पुरस्कार पाउने छ । सन् २०१९ देखि शुरू भएको विश्व टेस्ट च्याम्पियनशिपको पहिलो संस्करण न्युजिल्यान्डले जितेको थियो । यस्तै दोस्रो संस्करण अस्ट्रेलियाले जितेको थियो । यी दुवै संस्करणमा भारत उपविजेता भएको थियो ।