काठमाडौं, जेठ १० । रास्वपा सभापति रवि लामिछानेसहित तीन जनामाथि लागेको सहकारी ठगी मुद्दाको अभियोग संशोधनसम्बन्धी तत्कालीन महान्यायाधिवक्ताको निर्णयलाई कास्की जिल्ला अदालतले स्वीकार गरेको छ । अहिले व्याप्त बनेको चर्चाअनुसार लामिछानेसहित जीवी राई र छविलाल बन्जाडे जोशीसमेत उक्त अभियोगबाट उन्मुक्त छन् ।अधिवक्ता केशवराज अर्यालका अनुसार उनीहरू विरुद्ध अझै तीनवटा जिल्लामा सहकारी ठगी सहित संगठित अपराध र सम्पत्ति शुद्धीकरण मुद्दा कायमै छ ।

तसर्थ लामिछानेसहितका प्रतिवादी सबैतिरको संगठित अपराध र सम्पत्ति शुद्धीकरण मुद्दाबाट उन्मुक्त भएका छैनन् । त्यसमाथि सर्वोच्च अदालतमा यही विषयको मुद्दा विचाराधीन छ । यसर्थ तत्कालीन महान्यायाधिवक्ता सविता भण्डारीको अभियोग संशोधन गर्ने निर्णयका कारण लामिछानेसहितका प्रतिवादी अझै पूर्णतः मुक्त छैनन् ।

मुलुकी अपराध संहिता २०७५ ले सम्पत्ति शुद्धीकरण मुद्दा दर्ता भएपछि फिर्ता नहुने सूचीमा राखेको छ ।

कास्की जिल्ला अदालतले सूर्यदर्शन सहकारी ठगी प्रकरणसँग सम्बन्धित मुद्दामा सरकारी पक्षले पेश गरेको अभियोग पत्र संशोधनको मागलाई सदर गरेको थियो । न्यायाधीश हिमलाल बेलवासेको इजलासले गरेको यो निर्णयसँगै उक्त मुद्दा मुख्यरूपमा ‘सहकारी ठगी’ मा मात्र केन्द्रित हुने भएको छ । यद्यपि रुपन्देही, काठमाडौं, पर्सा र चितवन जिल्ला अदालतमा ती मुद्दा जारी छन् ।

अधिवक्ता अर्यालका अनुसार महान्यायाधिवक्ताले अभियोग संशोधन गर्नका लागि गरेको निर्णय सबै अदालतले स्वीकार नगरेसम्म कोही पनि मुद्दाबाट मुक्त हुँदैनन् ।