डण्ड गुरुङ/दिपायल ३ जेठ। नेकपा माओवादी केन्द्रको मध्यपहाडी लोकमार्ग जनजागरण अभियानको आज तेस्रो दिन । शुक्रबार साँझ दिपायल आइपुगेका अध्यक्ष प्रचण्डसहितका नेताहरु सदाझै शनिवार बिहानै मर्निङ वाकमा निस्किए ।

माओवादी जनजागरण अभियानमा देखिएका मर्निङ वाक आकर्षण छुट्टै छन् । जनता नजिक पुग्ने अभियानअन्तर्गत नै बिहानी हिडाई रहेको नेताहरु बताउँछन् ।

शनिवारको मर्निङ वाकका केही रोचक प्रसंगले झनै रौनकता थपिएको थियो ।

प्रचण्ड दिपायलस्थित एकजना कार्यकर्ताको घरमा बास बसेका थिए । अन्य नेताहरु कोही कार्यकर्ता त कोही होटलमा बास बसे ।

प्रचण्ड दिपायल बजारबाट अघि बढ्दै जाँदा उपाध्यक्ष तथा पूर्वउपराष्टपति नन्दबहादुर पुन पासाङ भने सेती पुलमा पुगिसकेका थिए । केही कार्यकर्ता र अंगरक्षकसहित पुलमा प्रचण्ड आउने बाटो कुर्दै थिए । उनी भन्दै थिए, ‘सिएम आउनुहुन्छ अनि अघि बढौला ।’

डोटी सदरमुकाम दिपायलमा प्रचण्डको मर्निंग वाक

प्रचण्डसहित नेताहरुको टोली पुल पुग्दा पासाङ अघिअघि नै बढे । वाइसिएलका टीमसहित पासाङ दौडिए । टोली डोटी विमानस्थलसम्म पुग्यो । फर्कँदा पनि पासाङ प्रचण्डकै अघिअघि नै दौडिए ।

दिपायल बजार आइपुगेपछि बल्ल प्रचण्ड र पासाङको भेट भयो । पासाङलाई प्रचण्डले भने, ‘तपाई त आर्मी कमाण्डर जत्तिकै कमाण्ड गरेर दौडिनुभा’छ । मुसुक्क मुस्कुराउँदै पासाङले भने, ‘आवश्यक परे फेरि पनि कमाण्ड गर्न तयार छु ।’

प्रचण्ड र पासाङबीचको यो संवाद रोचक बन्यो । पासाङ आफ्नो बासस्थानतिर लागे ।

आमजनसमुदायमा पुग्ने उद्देश्यका साथ जनजागरण अभियान अघि बढाइरहेका माओवादीले मर्निङवाकलाई पनि जनतासमक्ष पुग्ने माध्यमका रुपमा लिएका छन् ।

आफ्ना अध्यक्षसँगै हिड्न पाउँदा नेता, युवा, विद्यार्थीहरुमा पनि खुशियाली देखिन्थ्यो । सर्वसाधारण पनि प्रचण्ड हिडेरै आफ्ना घरआँगनमा आएको देख्दा छक्क परेर अभिवादन गरिरहेका देखिन्थे ।

विगतका अभियानभन्दा यसपटक फेरिएको प्रचण्ड शैली केही हदसम्म जनमुखी देखिएका छन् । विगतमा आकर्षक होटलहरुमा बसोबास रहने माओवादी नेताहरु यसपटकको अभियानमा कार्यकर्ता घरमा बास बस्ने गरेको देखिएका छन् ।