काठमाडौँ, २२ वैशाख । कांग्रेस नेता शेखर कोइरालाले नीति कार्यक्रमले कांग्रेस एमालेबीच भएको सात बुँदे सहमतिलाई बेवास्ता गरेको बताएका छन्। सोमबार संसद भवन नयाँ बानेश्वरमा उनले सरकार गठन हुँदाका बखत दुई दलबीच भएको सात बुँदे सहमतिलाई नीति कार्यक्रमले समेट्न नसकेको उल्लेख गरेका हुन्।कोइरालाले भने, ‘सात बुँदे सहमतिमा आधार भएर सरकार बनेको हो। संविधान संशोधन, आर्थिक सुधारका कुरा, भ्रष्टाचारलाई अन्त्य गर्ने, सुशासन दिने कुरा, दण्डहिनतालाई अन्त्य गर्ने कुरा त्यो कुराहरुमा सरकार चुकेको छ। त्यसलाई समेट्न जरुरी छ।’ उनले संविधान संशोधन लामो प्रक्रिया भए पनि ठूला दलको नेतृत्वमा सरकार बनेको नौ महिनासम्म पनि त्यसको प्रक्रिया सुरु नहुनु उचित नभएको बताए। ‘संविधान संशोधनमा पुनरावलोकन गने कुरा कांग्रेस र एमालेको दुई तिहासका आधारमा होइन, संसदका सबै दलको प्रतिनिधित्व गरेर सरकार वालाहरुको समेत राय लिएर गर्नुपर्छ। संविधान संशोधन गर्न समय लाग्छ। तर ९ महिना भइसक्यो सुरु गरेको भए हुन्थ्यो, कोइरालाले भने।

उनले सरकारको विषयलाई लिएर कांग्रेसभित्र कुनै पनि किसिमको समस्या नभएको दाबी गरे। ‘कांग्रेसभित्र कुनै पनि किसिमको समस्या छैन। त्यो उहाँहरुलाई लागेको हो। कति मिडियाहरुले गतल प्रचार पनि गरिदिन्छन्।’ उनले आफूले नै सरकार ढाल्न लाग्यो भन्ने गलत प्रचार भएको टिप्पणी गरे।
‘कति मिडियाहरुले पनि मेरै बारेमा सरकार ढाल्न खोज्यो भन्ने ल्याउनुभएको थियो। त्यो होइन। यो सरकारलाई असफल हुने छुट छैन, उनले भने।

कोइरालाले पालिका तहसम्म संयन्त्र बनाएर सरकार चलाउने कुरा ठीक नभएको जिकिर गरे। कोइरालाले भने, ‘मैंले भनेको चाहिँ के हो भने, संयन्त्र जुन हामीहरुले बनाएका छौँ। डेमोक्र्टिक सिस्टममा जाने भए, त्यो संयन्त्र बनाउनु हुँदैन। सरकारभित्रको संयन्त्रन बनाउनुहोस्। पालिकासम्मको संयन्त्र बनाउने होइन। पालिकासम्म संयन्त्र बनाएर जाने कुरा गलत हो।’