काठमाडौं २२ चैत । अमेरिकी राष्ट्रपति डोनाल्ड ट्रम्पले नयाँ कर घोषणा गरेको एक दिनपछि विश्व शेयर बजारमा ठूलो गिरावट देखिएको छ । नयाँ कर घोषणाले मूल्य बढाउने तथा अमेरिका र विदेशमा वृद्धिलाई असर गर्ने अनुमान गरेको बीबीसीले जनाएको छ ।

दोस्रो दिन पनि एशिया प्यासिफिक क्षेत्रको शेयर बजारमा गिरावट आएको छ । अमेरिकी शेयर बजारमा भने सन् २०२० पछिको सबैभन्दा ठूलो गिरावट आएको छ । नाइके, एप्पल र टार्गेटको शेयर सबैभन्दा धेरै प्रभावित भएको छ । यी कम्पनीहरूको शेयर ९ प्रतिशतभन्दा धेरैले घटेको छ । यस्तै बेलायतको एफटीएसई १०० सूचकाङ्क खुल्नेबित्तिकै घटेको छ ।

अमेरिकी राष्ट्रपति ट्रम्पले भने आफ्नो कर कार्यान्वयन ‘धेरै राम्रो’ भइरहेको र ‘बजार उकालो लाग्ने’ बताउनुभएको छ ।

यसैबीच ह्वाइट हाउसमा ट्रम्पले अमेरिकी अर्थतन्त्रलाई गति दिन र सङ्घीय राजश्व बढाउन विश्वव्यापी आयातमा १० प्रतिशत कर लगाउने योजना बताएको बताउनुभएको छ । चीन र युरोपेली युनियनले अमेरिकी करको जवाफ दिने सङ्केत गरेका छन् ।

भोलिदेखि लागू हुने विश्वव्यापी आयातमा न्यूनतम १० प्रतिशत करको प्रतिक्रिया दिने बेइजिङदेखि ब्रसेल्ससम्मका नेताहरूले वाचा गरेका छन् ।

यस्तै युरोपेली सङ्घमा २० प्रतिशत र चीनमा ५४ प्रतिशतसहित उच्च शुल्कहरू अप्रिल ९ देखि लागू हुने तय भएको छ ।