पोखरा, ३ फागुन । सफल पोखरा अन्तराष्ट्रिय म्याराथनमा केन्याली धावकले वर्चस्व कायम गरेका छन् । १९ औं संस्करणको सफल पोखरा म्याराथनमा पहिलो, दोस्रो र तेस्रो स्थान केन्याली खेलाडीले विजयी बने ।
निर्धारित ४२.१९५ किलोमिटरको दुरी केन्याली धावक विल्सन चेरुयोटले २ घण्टा १७ मिनेट २४ सेकेण्डमा पूरा गदै पहिलो हुन सफल भए । केन्याकै जुलियास मुरियाली वाहोमल २ घण्टा १७ मिनेट २७ सेकेण्डमा पूरा गर्दै दोस्रो भए । उनी अघिल्लो म्याराथनमा पहिलो भएका थिए ।
केन्याकै ओनिसले २ घण्टा १८ मिनेट ५१ सेकेण्डमा दुरी पुरा गर्दै तेस्रो स्थान पक्का गरे । नेपालका किरण सिंह बोगटी चौथो स्थानमा आउन सफल भए । उनले २ घण्टा ३८ मिनेट १७ सेकेण्डमा म्याराथन पूरा गरे । १९ औं संस्करणको पोखरा म्याराथनमा २१ देशका ८० जना विदेशी सहित १ सय ५० जना धावकहरुले सहभागिता जनाएका थिए ।
त्यसै गरी २१ किलोमिटर हाफ्म्याराथनमा सन्तोषी श्रेष्ठ पहिलो भइन् । उनले १ घण्टा २० मिनेट ३ सेकेण्डमा दौड पुरा गरिन् । त्यसै विदेशी खेलाडी स्वारोन जेनोटिचले १ घण्टा २१ मिनेट ७ सेकेण्ड दुरी पुरा गर्दै दोस्रो, पुष्पा भण्डारीले १ घण्टा २३ मिनेट ८ सेकेण्डमा दुरी पुरा गर्दै तेस्रो र आस्मा विकले १ घण्टा ३७ मिनेट ४ सेकेण्डमा दुरी पुरा गरीन् ।
त्यसै गरी २१ किलोमिटर हाफ्म्याराथनमा पुरुष तर्फ सन्तोष विक्रम विष्ट पहिलो भए । उनले निर्धारीत दुरी १ घण्टा ९ मिनेट ७ सेकेण्डमा सम्पन्न गरे । गजेन्द्र राईले १ घण्टा ९ मिनेट ५६ सेकेण्डमा दुरी पुरा गर्दै दोस्रो र विदेशी धावक इमानुएलले १ घण्टा १० मिनेट २ सेकेण्डमा दुरी पुरा गर्दै तेस्रो भए ।
हाफ म्याराथनमा महिला तर्फ १० देशका ४० जना र पुरुष तर्फ १० विदेशीसहित १ सय १० जनाले सहभागीता जनाएका छन् । १० किलोमिटर पुरुष विधामा ११ देशका २ सय ११ जना, १० किलोमीटर महिला तर्फ ११ विदेशी सहित १ सय ९ जना, ५ किलोमिटर छात्र तर्फ १ हजार ४ सय ७० र छात्रा तर्फ १ हजार २५ जनाले सहभागि जनाका थिए । पोखरा रङ्गशालाबाट शुरु भएको म्याराथन विभिन्न ठाउँ हुदै पोखरा ६ हल्लन चोकमा समापन भएको थियो ।
म्याराथनका विजेताले नगद ५ लाख, दोस्राले ३ लाख, तेस्राले २ लाख, चौथोले ५० हजार, पाँचौँ लाई ३० हजार, छैटौँलाई २० हजार, सातौँलाई १५ हजार र आठौँ हुनेलाई १० हजार प्रदान गरेको आयोजक संस्थाका भूतपूर्व खेलाडी मञ्च नेपालका अध्यक्ष दिल बहादुर गुरुङले जानकारी दिए ।
यस्तै गण्डकी प्रदेश तर्फको विजेताले ५० हजार, दोस्रो ३० र तेस्रो हुनेले २० हजार रुपैयाँ गरे । महिला हाफ म्याराथनको विजेताले १ लाख ५० हजार दोस्रो १ लाख, तेस्रोले ७५ हजार सान्त्वना हुनेले १५ हजार रुपैयाँ प्राप्त गरे ।