युएससीआईएसले अमेरिकाको ८५ हजार कामदार भिसा एच वान बीको लोटरी घोषणा गरेको छ । आगामी मार्च ७ को मध्यान्हदेखि मार्च २४ को मध्यान्हसम्म लोटरीका लागि प्रारम्भिक दर्ता अवधि तोकिएको छ । यो अवधिमा सम्भावित रोजगारदाता र प्रतिनिधिहरूले छनोट प्रक्रियाको लागि प्रत्येक लाभार्थीलाई इलेक्ट्रोनिक रूपमा दर्ता गर्न सक्नेछन् । अनलाइन एकाउन्टबाट प्रत्येक लाभार्थीको लागि सम्बन्धित दर्ता शुल्क तिर्न सकिनेछ ।

यसपटक कामदार भिसा एच वानबी लोटरीमा सहभागी हुनका लागि शुल्क १० डलरबाट बढाएर २१५ डलर बनाइएको छ । रोजगारदाता कम्पनी वा तिनीहरूका प्रतिनिधिहरूले छनोट प्रक्रियाको लागि प्रत्येक लाभार्थीलाई इलेक्ट्रोनिक रूपमा दर्ता गर्न र प्रत्येक लाभार्थीको तर्फबाट पेश गरिएको प्रत्येक दर्ताको लागि सम्बन्धित २१५ डलर दर्ता शुल्क तिर्न युएससीआईएसको अनलाइन खाता प्रयोग गर्नुपर्ने युएससीआईएसले जनाएको छ ।

सम्भावित कामदारका तर्फबाट आवेदन दिने रोजगारदाताको अनलाइन खाता नभएका युएससीआईएसमा संगठनात्मक खाता सिर्जना गर्नुपर्नेछ। आर्थिक बर्ष २०२१ देखि २०२४ को बीचमा विगतमा अनलाइन खाता भएका तर आर्थिक बर्ष २०२५ का लागि खाता प्रयोग नगरेकाहरुको खाता लग इन पछि संगठनात्मक खातामा रूपान्तरण हुनेछ। पहिलो पटक दर्ता गर्नेहरूले कुनै पनि समयमा खाता सिर्जना गर्न सक्छन्। प्रारम्भिक दर्ता अवधि सुरु हुनु अघि बारम्बार सोधिने प्रश्नहरु अद्यावधिक गरिने युएससीआईएसले जनाएको छ ।