अर्घाखाँची, २२ माघ ।किशोरीलाई पाठेघरको मुखको क्यान्सर विरुद्धको ‘ह्युमन पापिलोमा’ भाइरस (एचपिभी) खोप अभियान सुरु भएको छ । अहिले कक्षा ६ देखि १० सम्म पढ्ने तथा १० वर्षदेखि १४ वर्ष उमेर समूहका किशोरीहरुलाई खोप प्रदान गरिन लागिएको हो ।

किशोरीलाई पाठेघरको मुखको क्यान्सर रोग लाग्नबाट बचाउन आजदेखि फागुन ६ गतेसम्म एचपिभी खोप अभियान सुरु भएको छ । स्वास्थ्य कार्यालय अर्घाखाँचीले सन्धिखर्क स्थित सन्धिखर्क ग्रिन ईङलिस बोर्डिङ्ग स्कूलका छात्राहरुलाई एचपिभी खोप लगाएर एचपिभी खोप अभियान जिल्लामा सुरु गरेको स्वास्थ्य कार्यालय अर्घाखाँचीले जनाएको छ । मंगलबार विश्व क्यान्सर दिवसको अवसर पारेर देशभर र जिल्लाभरका अधिकांश विद्यालय (खोपकेन्द्र)मा खोप अभियान सुरु भएको जिल्ला खोप समन्वय समितिका संयोजक तथा जिल्ला समन्वय समिति अर्घाखाँचीका प्रमुख जीवनारायण कोइरालाले बताए । समन्वय समितिका प्रमुख कोइरालाले निरोगी नेपाल बनाउनका लागि सरकारले यस्ताखाले कार्यक्रम सधैं ल्याउन आवश्यक रहेको बताए । एचपिभी खोप अभियानले नेपाली महिला र भविष्यको नेपाललाई स्वस्थ बनाउन सहयोग पुग्ने कोइरालाले दाबी गरे । यस्तै प्रमुख जिल्ला अधिकारी बाबुराम अर्यालले रोग लागेपछि उपचार गर्नुभन्दा रोग लाग्न नदिनु उत्तम भएको बताए । अर्घाखाँची जिल्लाभर पाठेघरको मुखको क्यान्सर विरुद्धको एचपिभी खोप ८ हजार १७८ किशोरीलाई लगाइने स्वास्थ्य कार्यालय अर्घाखाँचीका कार्यालय प्रमुख शिव नेपालीले बताए ।

उनका अनुसार अर्घाखाँचीमा २०६ खोपकेन्द्रबाट एचपिभी खोप लगाइदै छ । जिल्लाभरका १४५ विद्यालय र विद्यालय पहुँचबाहिर रहेका तथा खोप लगाउन छुटेका किशोरीलाई ६१ वटै वडाका स्वास्थ्य केन्द्रबाट खोेप दिइने उनको भनाई छ । अर्घाखाँचीको पाणिनी गाउँपालिकामा माघ २९ गतेदेखि फागुन ६ गतेसम्म खोप अभियान सुरु हुँदैछ भने अन्य पाँच पालिकामा आज अर्थात् माघ २२ गतेदेखि २८ गतेसम्म एचपिभी खोप अभियान संचालन भएको छ ।

पाठेघरको मुखको क्यान्सरका कारण कयौंले ज्यान गुमाइसकेका स्वास्थ्य कार्यालय अर्घाखाँचीका कार्यक्रम संयोजक विजय विकले बताए । उनका अनुसार यो अवस्थालाई न्यूनिकरण गर्न सरकारले प्रतिरोधात्मक क्षमता अभिवृद्धि गर्न यो अभियान संचालन गरेको बताए । यो खोपले स्वास्थ्यमा कुनैपनि असर नगर्ने विकले बताए ।