काठमाडौं १८ माघ । राष्ट्रिय स्वतन्त्र पार्टी रास्वपा का सांसदहरूले प्रतिनिधिसभा बैठक १५ मिनेटका लागि बहिष्कार गरेका छन् । बिहीबार संसद्को हिउँदे अधिवेशन सुरु हुनासाथ रास्वपाका सांसदहरूले आकस्मिक समय माग गरेका थिए ।

उनीहरूले सुरुमा आफूहरूले बोल्न पाउनुपर्ने र अनिमात्रै संसद्का अन्य कार्यसूचीमा प्रवेश गर्नुपर्ने माग गरेका थिए ।

यद्यपि सभामुख देवराज घिमिरेले आज दलगत रुपमा सबैले बोल्ने कार्यसूची रहेको जानकारी गराउँदै आफ्नो पालोमा बोल्न आग्रह गरे ।

तर, रास्वपा सांसदहरूले झण्डै आधा घण्टासम्म उभिएर अवरोध गरिरहे । रास्वपाको अवरोधपछि सभामुख घिमिरेले प्रतिनिधिसभा नियमावलीको दफा १५ पढेर सुनाएका थिए ।

तर, रास्वपा प्रमुख सचेतक सन्तोष परियारले आफूहरू ‘जनतालाई केही कुरा सुनाउन चाहने’ बताएका थिए ।

सभामुख घिमिरेले आफ्नो समयमा कुरा राख्न आग्रह गरिरहे । यद्यपि सभामुखको आग्रहलाई रास्वपाले अवरोध गरिरह्यो ।

सभामुख घिमिरेका अनुसार कार्यव्यवस्था परामर्श समितिको बैठकमा पनि रास्वपाले सुरुमा बोल्ने विषयबारे केही भनेको थिएन ।

‘आजकै विषयमा कुरा गर्दा पनि यस्तो विषय आएको थिएन,’ सभामुख घिमिरेले भने । उनीहरूले लागतार आकस्मिक समयको माग गरिरहेपछि सभामुख घिमिरेले अहिले बैठकको कार्यसूची अघि बढाएका छन् ।

‘मैले अघि पनि आजै पनि त्यस्तो आकस्मिक विषय जो हामी विषयवस्तुमा पुग्दा आपत्ति हुँदा सम्भवतः भएको छैन,’ सभामुखको भनाइ थियो ।

सभामुखको उक्त भनाइलाई प्रतिवाद गर्दै प्रमुख सचेतक परियारले आकस्मिक समय चाहिने बताए । उनलाई जवाफ दिँदै सभामुख घिमिरेले भने, ‘आफूलाई लागेको मात्रै आकस्मिक समय हुन सक्दैन, म संसद्को कार्यसूची अघि बढाउँछु ।’

त्यसपछि रास्वपा सांसदहरू बैठक बहिष्कार गरेर बाहिर निस्किए ।

रास्वपाले बैठक नै बहिष्कार गरेपछि अहिले प्रधानमन्त्री समेत रहेका नेकपा एमालेका संसदीय दलका नेता केपी शर्मा ओलीले सम्बोधन गरिरहेका छन् ।