काठमाडौं २५ पुस । नवलपरासीको दाउन्नेमा पुनः सवारी साधन अवरुद्ध भएका छन्।  शीतलहरले हिलाम्मे भएको सडकमा सवारी साधनहरु फस्दा यातायात अवरुद्ध भएको जिल्ला प्रहरी कार्यालय नवलपरासी पूर्व ९नवलपुर०का प्रहरी नायव उपरीक्षक डीएसपी जेसी शाहले जानकारी दिए।

‘अवरुद्ध सडक खुलाउने प्रयास भइरहेको छ,’ डीएसपी शाहले नेपालखबरसँग भने, ‘साना सवारी साधन अहिले फाट्ट फुट्ट चल्न थालेका छन्।’

पूर्वी र पश्चिम नवलपरासीको सिमानामा रहेको दाउन्नेमा गत बर्खामा सडक भासिएपछि यात्रुले लामो सयमदेखि सास्ती खेप्दै आएका छन्। त्यसमाथि खराब मौसमको कारण पछिल्लो समय त्यहाँ थप समस्या देखिएको प्रहरीले जनाएको छ।

नवलपरासी पश्चिम प्रहरीले बर्दघाट नगरपालिका ४ खुर्सानीखोला स्थित पूर्वपश्चिम राजमार्गमा हुस्सु तथा शितलहरको कारण बाटो चिप्लो भएको जनाएको छ।

यसैबीच गएराति नारायणढबाट भैरहवातर्फ जाँदै गरेको लु २ ख ५९८२ नम्बरको ट्रक हिलोमा चिप्लिएर अनियन्त्रित हुँदा तीनवटा सवारी साधनलाई ठक्कर दिएको छ।

उक्त ट्रकको ठक्करबाट ट्रक, मिनी ट्रक र कन्टेनरमा क्षति पुगेको जिल्ला प्रहरी कार्यालय नवलपरासी पश्चिमका सूचना अधिकारी डीएसपी रेशम बोहराले जानकारी दिए।

शीतलहर बढेसँगै उक्त सडकखण्डमा जोखिम बढेको उनले बताए। शीतलहरले सडक हिलाम्मे हुँदा मंगलबार रातिदेखि दुवैतर्फ सडक अवरुद्ध भएको थियो। बुधबार बिहान ३ बजेदेखि सडकमा एकतर्फी गाडी गुड्न थालेका थिए। तर, सवारी साधन सञ्चालन गर्दा जोखिम बढेपछि बुधबार बिहान पुनः राजमार्गमा सवारी साधन आवागमन बन्द गरिएको थियो।

बुधबार दिउँसोदेखि सामान्यरुपमा खुलेको सडक गएरातिदेखि पुनः बन्द भएको हो।