काठमाडौं २३ पुस । चीनले राष्ट्रपति सी चिनफिङ र अमेरिकामा राष्ट्रपतिको शपथ लिन लागेका डोनाल्ड ट्रम्प केही समययता सम्पर्कमा रहेको पुष्टि गरेको छ।

सोमबार नै ट्रम्पले एक अन्तर्वार्तामा प्रतिनिधिहरूका माध्यमबाट सीसँग आफूले कुराकानी गरिरहेको बताएका थिए। उनले सीसँग ‘सम्भवतः राम्रो मेलजोल हुने’ पनि बताएका थिए।

ट्रम्पको अभिव्यक्तिबारे सोधिएको प्रश्नमा मंगलबार चिनियाँ विदेश मन्त्रालयका प्रवक्ता कुओ चियाकुनले बेइजिङले ट्रम्पको टिप्पणीलाई महत्त्व दिने बताए।

‘चीन र अमेरिकाले अनेक माध्यमबाट सम्पर्क कायम राखेका छन्,’ उनले भने, ‘आपसी सम्मान, शान्तिपूर्ण सहअस्तित्व र दुवै पक्षको जित हुने सहकार्यका सिद्धान्तका आधारमा चीन अमेरिकासँग काम गर्न तयार छ।’

ट्रम्पले यसअघि पनि सीसँग आफ्नो कुरा भइरहेको बताएका थिए। तर, चीनले अहिलेसम्म त्यसको पुष्टि गरेको थिएन।

ट्रम्पले सीलाई शपथ समारोहमा पनि निम्त्याएका थिए। तर, सीले त्यसलाई अस्वीकार गर्ने देखिएको छ।

मंगलबार नै बाइडेन प्रशासनकी अर्थमन्त्री यानेट एलेनले चिनियाँ उपप्रधानमन्त्री हे लिफेङसँग भर्चुअल वार्ता गरेकी छन्।

अमेरिकामा सत्ता हस्तान्तरण भइरहँदा दुवै पक्षबीच चीन–अमेरिका आर्थिक सम्बन्ध स्थिर बनाउने सहमति भएको चिनियाँ पक्षले जनाएको छ। एजेन्सी