काठमाडौं २७ मंसिर ।  उपप्रधान एवं अर्थमन्त्री विष्णु पौडेलले कांग्रेस र एमालेबीचको गठबन्धनमा कुनै समस्या नरहेको बताएका छन् । एमाले उपाध्यक्षसमेत रहेका मन्त्री पौडेलले २०८४ कै निर्वाचनसम्म दुई पार्टीको सहकार्य हुने बताएका छन् ।

राष्ट्रिय समाचार समितिसँगको कुराकानीमा पौडेलले राजनीतिक स्थायित्वसहितको विकासको यात्रा तय गर्न कांग्रेस(एमालेको सहकार्य भएको समेत बताएका छन् । संविधान निर्माण भएपछि नेपाली जनताको चाहना सामाजिक न्यायसहितको समृद्धि हो । तर राजनीतिक अस्थिरताले हामीलाई त्यसतर्फ अघि बढ्न दिइरहेको थिएन । लामो इतिहास, योगदान र हैसियत भएका कांग्रेस, एमाले जस्ता पार्टीसँग बहुमत नहुने, साना दलहरुलाई जोडेर निर्माण गरिएको बहुमत लामो समय टिक्न र जनताको पक्षमा राम्रो डेलिभरी दिन नसक्ने समस्या हाम्रासामु थियो, उनले भनेका छन् ।

कांग्रेस र एमालेबीचको राजनीतिक सहयात्रा बलियो भएको पनि उनले बताएका छन् । नेपाली कांग्रेस र नेकपा ९एमाले०को बीचमा कायम भएको यो राजनीतिक सहयात्रा कुनै काँचो धागोमा अडिएको छैन । यो निश्चित ध्येय र उद्देश्यमा आधारित छ । राजनीतिक स्थायित्वको बलमा संविधानको रक्षा र विकास, सबै प्रकारका अतिवाद र अस्थिरताका प्रवृत्तिहरुको अन्त्य, सामाजिक न्यायसहितको विकास र समृद्धि यो सहयात्राको मुख्य उद्देश्य हो, उनले भनेका छन् ।

अहिले कांग्रेस र एमालेको बीचमा दरार सिर्जना गर्नका लागि विभिन्न प्रयास भइरहे पनि त्यसलाई परास्त पार्दै राजनीतिक स्थायित्व सुनिश्चित गर्ने पौडेलले बताए । जनतामा विशेषगरी युवा–युवतीमा, निजी लगायत उत्पादनका हरेक क्षेत्रमा आशा भर्छौं । यो सहयात्रा २०८४ को आम निर्वाचनसम्मका लागि हो । त्यतिबेलासम्म नै कायम रहन्छ, कसैले प्वाल पार्ने वा भत्काउने चेष्टा नगरे हुन्छ, उनले भने ।

त्यसैगरी प्रधानमन्त्री ओलीको चीन भ्रमण अत्यन्त सफल र ऐतिहासिक रहेको समेत पौडेलको भनाइ छ । यस भ्रमणले नेपाल र चीनबीचको आपसी सम्बन्धलाई नयाँ उचाइमा उठाएको छ । भ्रमणका क्रममा विगतमा भएका सम्झौताहरुको कार्यान्वयनमा जोड दिनुका साथै नयाँ ऐतिहासिक महत्त्वका सम्झौताहरु पनि सम्पन्न भएका छन् । नेपालको आर्थिक विकास, विशेषगरी पूर्वाधार विकासमा यी सम्झौताहरुको विशेष र दूरगामी महत्त्व छ, उनले कुराकानीमा भनेका छन् ।

बीआरआई सम्झौतमा भएको हस्ताक्षर कांग्रेस र एमालेबीचको सहमतिअनुरूप नै भएको समेत उनको भनाइ छ ।  कसैले यस विषयलाई उछालेर दुई प्रमुख पार्टीका बीचमा अन्तरविरोध सिर्जना गर्न सकिन्छ कि भन्ने ठानेको छ भने त्यो भ्रम मात्र हो, उनी भन्छन् ।