काठमाडौं २० मंसिर । नेपाल प्रिमियर लिग एनपीएल अन्तर्गत बिहीबारको दोस्रो खेलमा काठमान्डु गुर्खाजसामु सुदूरपश्चिम रोयल्सले जितका लागि १ सय ६८ रनको लक्ष्य प्रस्तुत गरेको छ।
कीर्तिपुरस्थित त्रिवि क्रिकेट मैदानमा काठमान्डु गुर्खाजले टस जितेर फिल्डिङ रोजेपछि ब्याटिङ गरेको सुदूरपश्चिमले निर्धारित २० ओभरमा ६ विकेटको क्षतिमा १ सय ६७ रनको योगफल तयार पारेको हो।
दोस्रो विकेटका लागि ओपनर विनोद भण्डारी र ब्रान्डोन म्याकमुलेनले ८६ रनको साझेदारी गरे। म्याकमुलेन ५३ रनमा गेहार्ड इरासमसको बलमा साहब आलमको हातबाट क्याच आउट हुन पुगे। म्याकमुलेनले ३१ बलमा ३ चौका र ४ छक्का सहयोगमा अर्धशतक पूरा गरेका थिए।
ओपनर भण्डारी ३५ रन बनाउँदा साहब आलमको बलमा एलबीडब्लु धरापमा परे।
कप्तान दीपेन्द्रसिंह ऐरी ४३ रन बनाउँदै पेलेलियन फर्के। २५ बलमा ३ चौका र २ छक्का हानेका दीपेन्द्र करण केसीको बलमा माइकल लेविटको हातबाट क्याच आउट भए।
अर्का ओपनर जैब खान ११ रन बनाउँदा रासिद खानको बलमा बोल्ड आउट भए। रोहन मुस्ताफा ५ रन बनाउँदा रासिदकै बलमा बोल्ड आउट भए। आरिफ शेख ३ रन बनाउँदा रनआउट हुन पुगे।
स्कट कुगलेइन ७ र ईशान पाण्डे १ रनमा अविजित रहे।
काठमान्डुका लागि रासिद खानले दुई विकेट लिए। करण केसी, साहब आलम र जेहार्ड इरासमसले समान एक विकेट झारे।
काठमान्डुले केही बेरमा जवाफी ब्याटिङ गर्नेछ।
प्रतिक्रिया दिनुहोस्