सिन्धुली । जिल्लामा जारी सेभेन ए साईड खुल्ला फुटबल प्रतियोगिताको उपाधि रानिखोला युवा क्लवले जितेको छ । मंगलबार भएको फाइनल खेलमा सिन्धुली एकेडेमिलाई पराजित गर्दै गोलन्जोर गाउँपालिकाको रानिखोला युवा क्लवले उपाधि जितेको हो ।

शुभ दिपावली तथा छठको अवसर पारेर सिन्धुली –६ धुराबजार युवा क्लवले खुल्ला फुटबल प्रतियोगिता आयोजना गरेको थियो । सिन्धुली एकेडेमिलाई २–० गोल अन्तरले पराजित गर्दै रानिखोला युवा क्लवले उपाधि जितेको क्लवका अध्यक्ष उमेश कुमार भोलनले जानकारी दिए ।

सेमिफाइलमा रानिखोला युवा क्लवले सुर्य किरण सामुदायिक युवा क्लवलाई २–० गोल अन्तरले हराउँदै फाइनलमा प्रवेश गरेको थियो भने सिन्धुली एकेडेमिले ब्लु अल्पाइन युवा क्लव लाई ३–१ गोल अन्तरले हराउँदै फाइनलमा प्रवेश गरेको थियो ।

विजेतालाई ५० हजार नगद, शिल्ड, मेडल र प्रमाण पत्र प्रदान गरिएको छ भने उपविजेतालाई २० हजार नगद,शिल्ड,मेडल र प्रमाणपत्र प्रदान गरिएको थियो । समापन कार्यक्रमका प्रमुख अतिथी तथा कमलामाई नगरपालिका –६ का वडा अध्यक्ष उज्वल थापाले विजेता तथा उपविजेतालाई पुरस्कार प्रदान गर्नुभएको थियो ।

गत ८ गतेबाट सन्चालन गरिएको सेभेन ए साईड खुल्ला फुटबल प्रतियोगितामा महोत्तरी,सर्लाहि र सिन्धुलीको गरी १८ वटा क्लवको सहभागिता रहेको आयोजकले जनाएको छ ।