काठमाडौं ४ कात्तिक । नवलपुरमा दसैँको समयमा मात्र नियमविपरीत सञ्चालन भएका नौ सय सवारीसाधनका चालक कारबाहीमा परेका छन् । असोज १७ देखि कात्तिक १ सम्म सवारी नियम उल्लङ्घन गर्नेलाई कारबाही गरिएको हो ।

जिल्ला ट्राफिक कार्यालय नवलपुरका प्रमुख, प्रहरी निरीक्षक जनकराज बन्जाराले बढी भाडा लिने, छतमा यात्रु राख्ने, झुन्डिएर यात्रा गर्ने, मोटरसाइकलमा तीन जना चढ्ने, बिनाहेलमेट हिँड्ने, नियमविपरीत सञ्चालित सवारीसाधन चालकलाई कारबाही गरिएको बताउनुभयो ।

सबैभन्दा धेरै ३५२ मोटरसाइकल कारबाहीमा परेका छन् । त्यस्तै २४२ ट्रक, १७७ कार जिप, ५३ बस, ३७ टयाक्टर र ३७ अन्य सवारीसाधन कारबाहीमा परेका हुन् । चाडपर्वको समयमा यात्रुको चाप बढी हुने, छतमा झुन्डिएर यात्रा गर्ने र मादक पदार्थ सेवन गरेर सवारीसाधन चालाउने काम भइरहेकाले त्यसलाई कडाइका साथ जाँच गरिएको उहाँको भनाइ छ ।

यस्तै मादक पदार्थ सेवन गरी सवारी चलाउने ६१ जना कारबाहीमा परेका छन् । क्षमताभन्दा बढी बोकेका ७९ सवारीलाई कारबाही गरिएको छ । यसबाट सात लाख १७ हजार पाँच सय राजस्व सङ्कलन भएको जिल्ला ट्राफिक कार्यालय नवलपुरका प्रमुख प्रहरी निरीक्षक बन्जाराले बताउनुभयो । उहाँका अनुसार ‘सुरक्षित सडक यात्रा र सवारी, हामी सबैको जिम्मेवारी, सवारी दुर्घटना न्यूनीकरणका लागि गाउँ गाउँमा ट्राफिक प्रहरी’ भन्ने मूल नाराका साथ प्रहरीले अभियानलाई तीव्रता दिएको हो ।

दसैँतिहार, छठ जस्ता पर्वलाई लक्षित गरी प्रहरीले जाँचलाई तीव्र पार्नुका साथै यस अवधिमा १६४ वटा जनचेतनाका कार्यक्रम सञ्चालन गरिएको प्रमुख प्रहरी निरीक्षक बन्जाराको भनाइ छ । भिडभाड हुने स्थल र टिकट काउन्टरमा हुन सक्ने ठगी तथा आपराधिक क्रियाकलापलाई नियन्त्रण गर्न सादा पोसाकमा प्रहरी परिचालन गरी निगरानी बढाउँदा सर्वसाधारण कम ठगिएको बन्जराको दाबी छ ।

यात्रुको गल्ती, तीव्र गति, मापसे, मोबाइल फोनको प्रयोग, ओभरलोड, चौपाया, यान्त्रिक गडबडी र खराब सडकले बढी सवारी दुर्घटना हुने गरेको पाइन्छ । बढ्दो सवारी दुर्घटना न्यूनीकरण गर्न भन्दै जिल्ला प्रहरी कार्यालयमा आराम कक्ष ९रिफ्रेस सेन्टर० को व्यवस्था गरेको छ । लामो दुरीका सवारीसाधन जिल्ला प्रहरी कार्यालय परिसरमा रहेको रिफ्रेस सेन्टरमा एक घण्टा आराम गरेर गन्तव्यमा आवतजावत गर्ने गरेको जिल्ला प्रहरी कार्यालयका प्रहरी उपरीक्षक यादव ढकालले बताउनुभयो ।