काठमार्डौ । धरान उपमहानगरपालिकाका मेयर हर्क साम्पाङ यूके भ्रमणका लागि आज त्यसतर्फ प्रस्थान गरेका छन् ।

मेयर साम्पाङ यूके भ्रमणका क्रममा आर्थिक संकलनमा मात्र केन्द्रित नभएर यूकेका विभिन्न नगरपालिकाका समकक्षी मेयरहरूसँग भेटघाट कार्यक्रम तय गरेका छन् ।

विकास निर्माणको जानकारी लिने, विभिन्न पार्टीका साम्सददेखि संसद भ्रमण, यूकेका पर्यटकीय स्थानहरु पुग्ने लगायतका कार्यक्रम छन् ।

धरान समाज युकेको आयोजनामा भएको सो भ्रमणका कार्यक्रमहरूमा १९ अक्टोबरमा फोल्कस्टोनको ग्रान्ड बर्स्टिन होटलमा रात्रिभोज, २० अक्टोबरमा अल्डर्सट, २५ अक्टोबरमा ह्यारो फुटबल क्लबमा र २७ अक्टोबरमा स्विण्डनमा ३१ अक्टोबरमा चाथाममा कार्यक्रम आयोजना गरिएका छन्। अन्य कार्यक्रमहरू आशफोर्ड, ग्रेज, लन्डन र अन्य शहरहरूमा हुनेछन्। कति कार्यक्रमहरु एकै दिन दुई देखि ३ ठाउँसम्म रहेका छन।

सुम्निमा पारुहाङ मूर्ति निर्माण अभियानका लागि आर्थिक संकलन यसअघि नै सुरु भइसकेको छ र लाखौँ रकम जुटाउने लक्ष्य लिइएको छ। मेयर साम्पाङको प्रत्यक्ष उपस्थिति र सहभागिताले यो अभियानलाई थप उर्जा मिल्ने देखिएको छ । किरात राई यायोक्खा यूकेले पनि एक करोड रुपैयाँ सहयोग संकलन गर्ने लक्ष्य घोषणा गरिसकेको छ।

धरानलाई श्रमदानको माध्यमद्वारा विकास र सुधार गर्न कटिबद्ध मेयर साम्पाङले, चिन्डे डाँडामा सुम्निमा र पारुहाङको मूर्ति स्थापना गर्दै, धरानलाई धार्मिक पर्यटनको केन्द्र बनाउन ठूला कदम चालेका छन्।