काठमाडौं ९ भदौ । इजरायलले लेबनानमा रहेका हिजबुल्लाहमाथि आक्रमण सुरु गरेको छ । इजरायली सेनाका लडाकु विमानले हिजबुल्लाह रहेको क्षेत्रमा आक्रमण गरेको अन्तर्राष्ट्रिय समाचार संस्थाले जनाएका छन् ।
हिजबुल्लाहले इजरायलमाथि रकेट र मिसाइल आक्रमण गरेपछि जवाफमा कारबाही गरिएको इजरायलले जनाएको छ ।
इजरायल डिफेन्स फोर्सका प्रवक्ता ड्यानियल हगारीले भने, “हामीले हिजबुल्लाहको मिसाइल र रकेट आक्रमणलाई रोक्न आत्मरक्षाका लागि लेबनानमा आक्रमण गरेका छौँ ।”
इजरायलले लेबनानमा आक्रमण गर्नुअघि सर्वसाधारणलाई हिजबुल्लाह क्षेत्रबाट तुरुन्तै बाहिरिन चेतावनी दिएको बताइएको छ ।
करिब तीन दिनअघि इजरायली सेनाले दक्षिणी लेबनानमा हिजबुल्लाहका १० वटा स्थानलाई निसाना बनाएको थियो । इजरायली लडाकु विमानहरूले लेबनान भित्रका हतियार भण्डार र सैन्य भवनहरूलाई निसाना भएको छ ।
लेबनानको स्वास्थ्य मन्त्रालयले इजरायलको आक्रमणमा एकजनाको मृत्यु भएको र ३० जना घाइते भएको बताएको छ ।
इजरायली आक्रमणहरूको जवाफमा हिजबुल्लाहले गोलान हाइट्स क्षेत्रमा ५० भन्दा बढी मिसाइलहरू प्रहार गरेको थियो ।
हिजबुल्लाहले आफ्ना सैन्य कमान्डर फुआद शुक्रको हत्याको बदला लिन इजरायलमा ड्रोन र मिसाइल आक्रमण गरेको बताएको छ ।
इजरायलका प्रधानमन्त्री बेन्जामिन नेतन्याहूले आफ्नो मन्त्रिपरिषद्को आपतकालीन सुरक्षा बैठक बोलाएका छन् ।
प्रतिक्रिया दिनुहोस्