काठमाडौं २७ साउन । भारतका नयाँ विदेश सचिव विक्रम मिस्री दोस्रो विदेश भ्रमणका रुपमा आइतबार (आज) नेपाल आउँदैछन्।

परराष्ट्र सचिव सेवा लम्सालको निमन्त्रणामा मिस्री दुईदिने नेपाल भ्रमणमा आउन लागेका हुन्। यस अघि उनले भुटानको भ्रमण गरेका थिए । भारतीय विदेश सचिव नियुक्त भएपछि सार्क देशहरुमा परिचय भ्रमणका रुपमा जाने चलन रहेको भारतीय दूतावासले जनाएको छ ।

मिश्री सोमबारसम्म नेपालमा रहनेछन्। भ्रमणका क्रममा उनले राजनीतिक भेटघाट गर्ने कार्यसूची रहेको परराष्ट्र मन्त्रालयले जानकारी दिएको छ।

‘विदेश सचिवको आगामी भ्रमणले दुई देशबीचको नियमित उच्चस्तरीय आदानप्रदानको परम्परालाई निरन्तरता दिनुका साथै छिमेकी पहिलो नीति अन्तर्गत भारतले नेपालसँगको सम्बन्धलाई दिएको प्राथमिकतालाई प्रतिबिम्बित गर्दछ,’ परराष्ट्र मन्त्रालयले जारी गरेको विज्ञप्तिमा भनिएको छ।
मिश्रीले काठमाडौंमा रहँदा राष्ट्रपति रामचन्द्र पौडेल, प्रधानमन्त्री केपी शर्मा ओली, प्रमुख विपक्षी दलका नेता पुष्पकमल दाहाल प्रचण्ड, कांग्रेस सभापति शेरबहादुर देउवा र केही मधेशी नेताहरुसँग शिष्टाचार भेट तथा राजनीतिक छलफल समेत गर्ने बताइएको छ । विनय मोहन क्वात्राको कार्यकाल सकिएसँगै मिश्री जुलाई १५ बाट विदेश सचिव नियुक्त भएका हुन् । उनी चीन विज्ञका रुपमा साउथ ब्लकमा लामो समय काम गरेको भारतीय उच्च कुटनीतिज्ञ हुन् ।