काठमाडौँ, १५ फागुन । रुसी राष्ट्रपति भ्लादिमिर पुटिनले आजदेखि सिरियाको पूर्वी गुटा इलाकामा दैनिक पाँच घण्टा हवाई हमला बन्द गरिने जनाएका छन् ।
राजधानी दमास्कस नजिकै विद्रोहीहरुको नियन्त्रणमा रहेको इलाकामा झण्डै चार लाख सर्वसाधारण युद्धको चपेटामा परेका छन्। रुसको सहयोगमा सिरियाली सेनाले भीषण हवाई हमला गर्दै आएका छन् । सिरियामा आठ दिन अघि देखि भएको सरकारी आक्रमणमा ५ सय ६० जनाभन्दा बढीको मृत्यु भईसकेको छ ।
रुसी रक्षामन्त्री सेर्गेइ शोइगुले स्थानीय समय अनुसार बिहान नौ बजेदेखि दिउँसो दुई बजेसम्म हमला रोकिने बताएका छन् । संयुक्त राष्ट्र संघ सुरक्षा परिषदमा ३० दिन युद्धविरामको प्रस्ताव पारित भएपछि पनि सिरियाली सरकारले हमला जारी राखेको थियो । गुटा सहरमा भएको पछिल्लो हवाई हमलामा सहर नै कुरुप बनेको छ ।
प्रतिक्रिया दिनुहोस्