काठमाडौं २१ जेठ । कान्तिपुर बचत तथा सहकारीका पूर्वअध्यक्ष सीबी लामा भनिने चन्द्रबहादुर तामाङविरुद्ध करिब एक हजार बचतकर्ताको रकम ठगी गरेको भन्दै जाहेरी परेको छ । प्रहरीका अनुसार सीबीविरुद्ध १ अर्ब ५१ करोड ८५ लाख ५२ हजार हिनामिना गरेको आरोपमा ९ सय ५२ जनाले उजुरी दिएका हुन् ।

कान्तिपुर सहकारीका सीबी लामाविरुद्ध ९५२ बचतकर्ताको जाहेरी

सहकारीमा राखेको बचत फिर्ता नपाएपछि एक हजारभन्दा बढी बचतकर्ताले उनलाई पक्राउ गरी कारबाहीको दायरामा ल्याउन र हिनामिना भएको बचत फिर्ताको माग गर्दै प्रहरी गुहारेका थिए ।

त्यसपछि काठमाडौं प्रहरी वृत्त नयाँ बानेश्वरले सीबी संलग्न कान्तिपुर सहकारीको फाइल खोलेको थियो । काठमाडौं उपत्यका प्रहरी कार्यालयबाट खटिएको टोलीले उनलाई शुक्रबार चितवनको नेपाल–भारत सीमा क्षेत्रबाट पक्राउ गरी काठमाडौं ल्याएको थियो । २०५५ देखि २०७६ पुस २४ सम्म कान्तिपुर सहकारीको अध्यक्ष रहेका सीबीले नेतृत्वमा रहेकै बेला सहकारीको रकम अपचलन गरेका तथ्यहरू भेटिएको र त्यसकै आधारमा अनुसन्धान अघि बढाइएको काठमाडौं उपत्यका अपराध अनुसन्धान कार्यालयका एसएसपी सानुराम भट्टराईले बताए ।

जिल्ला अदालत काठमाडौंले सीबीविरुद्ध २०८० फागुन २० मा पक्राउ पुर्जी जारी गरेको थियो । त्यसपछि बानेश्वर वृत्तले उपत्यका अपराध अनुसन्धान कार्यालयको सहयोगमा खोजी थालेको हो ।

काभ्रेको तेमाल–५, नारायणस्थान स्थायी ठेगाना भएका सीबी काभ्रे कांग्रेसका पूर्वकोषाध्यक्ष तथा २०७४ को प्रदेशसभा निर्वाचनमा काभ्रे–१ ९क० बाट उम्मेदवार थिए । उनी हाल कांग्रेस महासमिति सदस्य पनि हुन् । २०४९ सालमा विज्ञापन एजेन्सीमा कार्यरत उनी २०५२ भदौमा तत्कालीन स्थानीय विकास मन्त्रालयअन्तर्गत प्राविधिक सहायक ९ओभरसियर० का रूपमा ८ महिना काम गरेर थिए ।

त्यसपछि कान्तिपुर सहकारीमा आबद्ध रही २१ वर्षसम्म अध्यक्ष रहे । त्यसको ४ वर्षपछि २०५९ मा तीनकुनेमा कान्तिपुर एकेडेमी अफ हेल्थ साइन्सका रूपमा कान्तिपुर अस्पताल सञ्चालनमा आएको थियो । सहकारीको रकम अस्पतालमा लगेर दुरुपयोग गरेकामा पनि प्रहरीले अनुसन्धान अघि बढाएको छ । उनी पशुपति सहकारीका पनि अध्यक्ष थिए । एउटै व्यक्ति दुई वटा सहकारीको अध्यक्ष हुन नपाउने व्यवस्थापछि कान्तिपुर सहकारी छोडेका थिए ।

प्रहरीका अनुसार २०८० कात्तिकमा पशुपति सहकारीलाई सरकारले समस्याग्रस्त घोषणा गरेपछि ५४ जनाले उनीविरुद्ध उजुरी दिएका थिए । करिब १२ करोड अपचलन भएको उजुरी प्रहरीको केन्द्रीय अनुसन्धान ब्युरो ९सीआईबी० मा विचाराधीन छ ।

समस्याग्रस्त सहकारी व्यवस्थापन समितिले पशुपति सहकारीसहितको अनुसन्धान गर्न सीआईबीमा पत्राचार गरेको थियो । एसएसपी भट्टराईका अनुसार आरोपित सीबीविरुद्ध चेक बाउन्स प्रकरणमा ४ वटामा बैंकिङ कसुरको मुद्दा छ । सहकारी ठगी प्रकरणमा पक्राउ परेसँगै बैंकिङ कसुरको अनुसन्धान पनि एकसाथ अघि बढ्ने प्रहरीले जनाएको छ ।