पोखरा, ४ फागुन । प्रदेश नं ४ सभाका सभामुख नेत्रनाथ अधिकारीले सबैले मिलेर यस प्रदेशलाई नमूना प्रदेशका रुपमा विकास गर्नुपर्नेमा जोड दिँदै तीव्र गतिमा काम गर्न प्रदेशसभा सचिवालयका कर्मचारीलाई निर्देशन दिनुभएको छ ।

प्रदेश प्रमुख बाबुराम कुँवरबाट सभामुखको पद तथा गोपनीयताको शपथ लिएपछि पदबहाली गर्दै अधिकारीले सचिवालयका कर्मचारीलाई त्यस्तो निर्देशन दिनुभएको हो ।

संघीयता कार्यान्वयन शुरु भएको छ यसलाई सफल बनाउन छिटोभन्दा छिटो काम गर्नुपर्ने आवश्यकता औँल्याउँदै उहाँले भन्नुभयो, “हामी हाम्रो स्थानबाट जुट्छौँ तपार्र्ईं तपाईको स्थानबाट जुट्नुहोस् । अब देश बनाउने जिम्मा हाम्रो कँधमा आएको छ ।’’

संघीयतालाई हेर्ने अझै धेरै भ्रम रहेको बताउँदै अधिकारीले ती भ्रम निवारण गर्न आवश्यक कानून छिटो छरितोरुपमा तर्जुमा हुनुपर्ने खाँचो औल्याउनुभयो ।

सभामुखको शपथ लिएर शहीदस्मृति पार्कमा शहीहदप्रति माल्यार्पण गरेपछि उहाँ सिधै नदीपुरस्थित प्रदेश भवन पुग्नुभएको थियो । सभामुखको कार्यकक्षमा पदभार ग्रहण गर्दै उहाँले प्रदेशसभा सञ्चालन गर्ने नियमावली बनाउने निर्णयमा हस्ताक्षर गर्नुभयो ।

प्रदेश भवनमा पुग्दा सभामुख अधिकारीलाई प्रदेश सचिवालयका सचिव जीवराज बुढाथोकीलगायतले स्वागत गर्नुभएको थियो ।