काठमाडौं, २७ मंसिर ।  यमनको सिया इस्लामवादी राजनीतिक एवं सैन्य संगठन हुथीले पानी जहाजहरू इजरायलतर्फ गए आक्रमण गर्ने चेतावनी दिएको छ ।

हुथीका एक वरिष्ठ अधिकारीले लाल सागर ९रेड सी० हुँदै यात्रा गर्ने जहाजहरूलाई इजरायल र त्यसले कब्जा गरेको क्षेत्रतर्फ यात्रा नगर्न चेतावनी दिएका हुन् ।

यमनको हुथी सर्वोच्च क्रान्तिकारी समितिका प्रमुख मोहम्मद अली अल हुथीले जहाज इजरायलतर्फ जानबाट रोकिनुपर्ने र यमन पार हुँदै जाने जहाजले रेडियो खुला राखी तुरुन्त हुथीसँग सञ्चार गर्नुपर्ने बताएका छन् ।

उनले आफ्नो पहिचान झुटो बताउने वा जुन देशको हो त्यो भन्दा फरक देशको झन्डा नराख्न पनि चेतावनी दिएका छन् ।

गाजामा इजरायलले गरिरहेको आक्रमणको चपेटामा परेका प्यालेस्टिनीसँग ऐक्यबद्धता व्यक्त गर्दै हुथीले इजरायल जाने जुनसुकै देशको जहाजलाई निशाना बनाउने चेतावनी दिएका छन् । यस्तै हुथीले अन्तर्राष्ट्रिय ढुवानी कम्पनीहरूलाई इजरायली बन्दरगाहसँग काम नगर्न भनेको छ ।

मंगलबार मात्रै हुथीले एक नर्वेजियन कर्मसियल ट्यांकरमा मिसाइल हानेको बताएको छ । आइतबार हुथीले बेलायती स्वामित्वमा रहेको जापानबाट सञ्चालित एक कार्गो जहाज अपहरण गरेको भिडियो सार्वजनिक गरेको थियो ।