काठमाडौं, १ मंसिर । नेपालमा टिकटकमा प्रतिबन्ध लगाउने सरकारको निर्णयविरुद्ध सर्वोच्च अदालतमा रिट दायर भएको छ।

वरिष्ठ अधिवक्ता दिनेश त्रिपाठीले शुक्रबार कार्यालय खुल्नासाथ सर्वोच्चमा रिट दायर गरेका हुन्।

सरकारले सामाजिक सद्‌भाव र पारिवारिक एकता बिथोलेको भन्दै गत सोमबारदेखि नेपालमा टिकटक प्रयोगमा प्रतिबन्ध लगाएको छ।

‘रिट पेस गरिसकेको छु। दर्ताको प्रक्रियामा छ’, त्रिपाठीले  भने, ‘सरकारको निर्णय बदर गर्न माग गरेको छु।’

यही कात्तिक २७ गते बसेको मन्त्रिपरिषद बैठकले नेपालमा टिकटकमा प्रतिबन्ध लगाउने निर्णय गरेको हो।

उक्त निर्णयको विरोध र समर्थनमा जनस्तरमा टिकाटिप्पणी भइरहँदा यसको निक्र्योल गर्ने जिम्मा अब सर्वोच्च अदालतमा पुगेको छ।