काठमाडौं, २४ असोज ।  प्रहरीको उपत्यका अपराध अनुसन्धान कार्यालयले शुक्रबार अनलाइन बेटिङमार्फत् करोडौँ कारोबार गर्ने पिन्टुकुमार साहलाई पक्राउ गर्‍यो ।

कार्यालयका प्रहरी उपरीक्षक एसपी रवीन्द्र रेग्मीका अनुसार उनले अनलाइन बेटिङ सञ्चालन गरी २४ करोड रुपैयाँ बराबरको कारोबार गरेको आधारमा पक्राउ गरिएको हो । झापा दमक नगरपालिका–१२ का ३० वर्षीय साहले नेपालमा अवैध मानिएको अनलाइन जुवा, सट्टाबाजीजस्ता अनलाइन खेलमा सक्रिय रहेको प्रहरीको दाबी छ ।

यसअघि उपत्यका अनुसन्धान कार्यालयकै टोलीले अनलाइन ग्याम्ब्लिङ र वान वेक्स बेटबारे युट्युवमा विज्ञापन गरेको भन्दै ३२ जेठमा ‘बल्छी धु्रवे’ नामले परिचित मरिचमान श्रेष्ठसहित आठ जना कलाकारलाई पक्राउ गरेको थियो ।

उनीहरु २४ दिन प्रहरी थुनामा बसेका थिए । जिल्ला अदालत काठमाडौंले जनही पाँच हजार रुपैयाँ धरौटीमा छाड्यो ।

एकातिर प्रहरीले अनलाइन बेटिङ कारोबारमा संलग्नहरुलाई धमाधम पक्राउ गर्दै कारबाहीको दायरामा तान्ने गरेको छ । अर्कातिर अवैध भनिएको अनलाइन ग्याम्ब्लिङ, बिंगो, स्पोर्टस् बेटिङ सञ्चालन गर्न एक निजी कम्पनीलाई अनुमति दिएको तथ्य बाह्रखरीले फेला पारेको छ ।

संस्कृति पर्यटन नागरिक उड्यन मन्त्रालयले १५ असार २०६७ मै नेपालमा अवैध मानिएको अनलाइन ग्याम्ब्लिङ सञ्चालन गर्न स्वीकृत दिएको भेटिएको हो ।

मन्त्रीस्तरीय निणर्यबाट लाजिम्पाटस्थित रक इन्टरनेशनल प्रालिलाई अनुमति दिएको भेटिएको हो । त्यतिबेला संस्कृति तथा पर्यटन मन्त्रीमा हालका श्रममन्त्री शरतसिंह भण्डारी थिए । रक इन्टरनेशनल प्रालिका सञ्चालक क्यासिनो ब्यवसायी किशोर सिलवाल हुन् ।

पर्यटन विभाग स्रोतका अनुसार शक्तिको आडमा उनले अवैध अनलाइन सट्टेबाजी, ग्याम्ब्लिङ सञ्चालन गर्ने अनुमति पाएका हुन् । त्यसरी अवैध अनलाइन ग्याम्ब्लिङ सञ्चालन गर्न अनुमति पाउने उनी एक्ला व्यवसायी हुन् ।

उक्त अनलाइन ग्याम्ब्लिङ सञ्चालन गरेबापत प्रतिवर्ष प्रतिस्थान ५० हजार शुल्क तोकिएको छ । स्रोतका अनुसार, सिलवालले नै अनलाइन ग्याम्ब्लिङ र बेटिङका लागि चिनियाँ समूहहरुलाई त्यही अनुमति बिक्री गर्ने गरेका हुन् ।

सिलवालले पाएको अनुमति देखाउँदै चिनियाँ समूहले काठमाडौंको अनेक ठाउँमा अनलाइन ग्याम्ब्लिङ र सट्टेबाजीको धन्दा सञ्चालनमा रहेको स्रोतको दाबी छ । केही स्थानमा प्रहरीकै संरक्षणमा समेत अनलाइन ग्याम्ब्लिङ हुने गरेका छन् । अवैध अनलाइन ग्याम्ब्लिङ गिरोहबारे २०७६ मै खुलासा भएको थियो ।

यो गिरोहले सुरुमा चिनियाँ नागरिकलाई नै मुख्य टार्गेट बनाएर धन्दा थालेका थिए । त्यतिखेर प्रहरीले काठमाडौंमा ठाउँ–ठाउँमा छापा मारेर १ सय २२ जना चिनियाँ नागरिकलाई पक्राउ गरेको थियो । उनीहरुले अनलाइन ग्याम्ब्लिङ, म्याच फिक्सिङ र अश्लिल भिडिओ देखाएर चीनमा रहेका व्यक्तिबाट रकम असुल्ने गर्थे । चिनियाँ प्रहरीको आग्रहमै प्रहरीले त्यतिबेला अपरेसन थालेको थियो ।

हाल चिनियाँ समूहले विभिन्न ठाउँबाट अनलाइन ग्याम्ब्लिङ खेलाउँदै आएको छ । गत वर्ष बानेश्वर र रुपन्देहीबाटसमेत अनलाइन ग्याम्ब्लिङ गर्ने ठूलो समूह पक्राउ परेका थिए । अनलाइन ग्याम्ब्लिङका लागि चिनियाँ समूहलाई रक इन्टरनेसनलका सञ्चालक सिलवालले नै भित्र्याउने गरेको आरोप उनीमाथि छ ।

प्रहरीका अनुसार, सिलवालको सम्बन्ध हाल ६० किलो सुन तस्करी आरोपमा पक्राउ परेका बेल्जियम नागरिक दावा छिरिङ र हाल फरार जीवन चलाउनेसँग पनि सम्बन्ध भएको भेटिएको छ ।

सञ्चालक किशोर सिलवालले आफूले ग्याम्ब्लिङ सञ्चालनको लागि लाइसेन्स लिएको स्वीकार गरे । उनले भने,“मैले अहिले सञ्चालन गरेको छैन । लाइसेन्स पहिला नै लिएको हो । नवीकरण गरेर मात्रै राखेको छु ।”

आफूले सञ्चालन नगरे पनि आफूले प्राप्त गरेको लाइसेन्सको अनुमति अरुलाइ सम्झौतामा बिक्री गर्ने बारेमा भने उनी स्पष्ट हुन चाहेनन् । “यो विषयमा तपाईंसँग पछि कुरा गर्छु,” सिलवालले भने ।