काठमाडौं, २२ असोज । इजरायल र प्यालेस्टिनी लडाकु समूह हमासबीच जारी युद्धमा १२ सयभन्दा बढी मानिसको मृत्यु भएको छ ।

शनिबार हमासले गरेको आक्रमणपछि इजरायलले जवाफी हमला सुरु गरेको थियो । इजरायलले यो आक्रमणमा अहिलेसम्म आफ्ना ८०० बढी नागरिकको मृत्यु भएको बताएको छ ।

यस्तै, प्यालेस्टाइनीहरूले गाजामा आफ्ना ४१३ भन्दा बढी नागरिकको मृत्यु भएको बताएको युरो न्युजले जनाएको छ । दुवैतर्फ गरी मृत्यु हुनेको संख्या १२ ससयभन्दा बढी भएको युरो न्युजले दावी गरेको छ । अन्य सञ्चारमाध्यमले पनि ११ सयभन्दा सय नाघेको उल्लेख गरेका छन् ।

आइतबार रातिसमेत प्यालेस्टिनी क्षेत्र गाजाबाट दक्षिणी इजरायलमा रकेट प्रहार भएको बताइएको छ ।

अमेरिकाले यो आक्रमणमा आफ्ना नागरिकको पनि ज्यान गएको बताउँदै हतियार र सैन्य सहयोगको घोषणा गरेको छ ।

नेपालसहित अन्य धेरै देशले इजरायलमा आफ्ना नागरिकको समेत मृत्यु भएको बताएका छन् ।