पोखरा, २५ भदौ । नेपाली सेनाको श्री भगवती दल गण, फूलबारी ब्यारेक पोखरामा सञ्चालित सि.सं. २ सैन्य आधार तालिमको अन्तिम दलेल कवाज सोमबार सम्पन्न भएको छ ।२०७९ मंसिर १ गतेदेखि सुरु भएको तालिमको सोमबार अन्तिम दलेल कवाज सम्पन्न भएको हो ।

तालिममा ९६ जना सैन्य शिक्षार्थी सहभागी थिए । तालिमको समापनका अवसरमा बोल्दै नेपाली सेना श्री नं। २३ बाहिनी अड्डाका सहायक बाहिनीपति महासेनानी सुरेश आचार्यले राष्ट्रको मेरुदण्ड सेना हो भने सेनाको मेरुदण्ड तालिम प्राप्त अनुशासित तथा कर्तव्यनिष्ठ सिपाही हो भन्ने तथ्यलाई हरहमेसा मनन् गर्न निर्देशन दिए ।करिब ९ महिनाको कठोर तालिमपश्चात् अन्तिम कवाज सम्पन्न गरेकोमा बधाई दिँदै महासेनानी आचार्यले अभिभावकहरूलाई धन्यवाद तथा तालिमका सहभागी सिपाहीहरुलाई शुभकामना समेत दिएका थिए ।

तालिममा सहभागी शिक्षार्थीमध्ये सैन्य कविराज अधिकारी सर्वोत्कृष्ट शिक्षार्थी बन्न सफल बनेको छन् । सोमबार सम्पन्न अन्तिम दलेल कवाज कार्यक्रममा नवनियुक्त तालिमे सिपाहीहरुका अभिभावकहरुको समेत उपस्थिति रहेको थियो । नेपाली सेना, भगवती दल गण, फूलबारी ब्यारेकका गणपति प्रमुख सेनानी सञ्जयकुमार खत्रीको अध्यक्षतामा भएको कार्यक्रममा कास्कीका प्रमुख जिल्ला अधिकारी वासुदेव घिमिरे, सहायक प्रमुख जिल्ला अधिकारी गंगाबहादुर क्षेत्री, सशस्त्र प्रहरी बल कालिका गणका गणपति सशस्त्र प्रहरी उपरीक्षक धनबहादुर बानियाँ, राष्ट्रिय अनुसन्धान विभाग, कास्कीका प्रमुख, उप अनुसन्धान निर्देशक उत्तम खनाल, जिल्ला प्रहरी कार्यालय, कास्कीका प्रवक्ता प्रहरी नायब उपरीक्षक श्रवणकुमार विकलगायत विभिन्न निकायका प्रमुख तथा प्रतिनिधिहरूको समेत सहभागिता रहेको थियो ।