काठमाडौं,२४ भदौ । सत्तासाझेदार दल नेपाली कांग्रेसका नेता शशांक कोइरालाले सबै राजनीतिक विषय अदालतमा पुर्‍याइनु गलत भएको बताएका छन् । आइतबार रामेछापमा आयोजित पत्रकार सम्मेलनमा उनले कोसी प्रदेशको राजनीतिक विषय अदालतमा पुर्‍याइएकामा असन्तुष्टि जनाएका हुन् ।

उनले कोसी प्रदेशको विषय जटिल भएको उल्लेख गरे । सर्वोच्च अदालत निर्णय गर्ने अन्तिम ठाउँ भएको उनले बताए । सबै विषय सर्वोच्चमा लैजाने भए सरकार पनि उसैलाई चलाउन दिए हुन्छ भन्दै उनले आक्रोश पोखे ।

“कोसी प्रदेशको राजनीति जटिल र अप्ठ्यारो छ । सर्वोच्चलाई यसमा ल्याउनै हुँदैन । सर्वोच्चले आफ्नो निर्णय गर्दिएपछि राजनीतिक बाटो नै पृथक् भएर जान्छ । सर्वोच्च अन्तिम निर्णय गर्ने ठाउँ हो,” उनले भने, “सबै कुरा यहाँ लाने भए सर्वोच्चले सरकार चलाओस्, हामी किन चलाउने ?

उनले कोसीको समस्या सबै पार्टीहरूले एक ठाउँमा उभिएर समाधान गर्नुपर्ने धारणा राखे ।