काठमाडौं, २९ साउन । नेपाली कांग्रेसका महामन्त्री गगन थापाले भ्रष्टाचार काण्डका सबै फाइल खोल्नुपर्ने बताएका छन्।

यी काण्डहरूमा संलग्न देखिएमा जुनसुकै पार्टीका भए पनि नेतादेखि सांसद कसैलाई छाड्न नहुने थापाले बताए।

नयाँ बानेश्वरमा सोमबार बसेको संसदीय दल बैठकमा बोल्दै थापाले भने, ‘हाम्रा स्मृतिमा रहेका जति ठूला भ्रष्टाचार काण्डहरूका सबै फाइल खोलौं। अनुसन्धान गर्दा निर्दोषमाथि अन्याय नहोस् तर दोषी देखिएमा जुनसुकै दलका नेता, नाता, सांसद, मन्त्री कसैले पनि छुट पाउनु हुँदैन।’

थापाले सुन प्रकरणमा नेकपा माओवादी केन्द्रका उपाध्यक्ष कृष्णबहादुर महरा र उनका छोराकोसमेत नाम आइरहेकोले त्यसतर्फ पनि सरकारले छानबिन गर्नुपर्ने बताएका छन्।

माओवादीको आइतबार बसेको पदाधिकारी बैठकमा सुन प्रकरणबारे प्रष्ट पार्न महरालाई प्रधानमन्त्री पुष्पकमल दाहाल प्रचण्डले आग्रह गरेका खबर आएको भन्दै उनले माओवादीले भन्दा पनि यसमा सरकारका निकायहरूले छानबिन गरिनुपर्ने बताए।

केही दिनअघि पूर्वप्रधानमन्त्री बाबुराम भट्टराईले माओवादीका लडाकू शिविर घोटालाको छानबिन गर्नुपर्ने कुरा उठान गरेको प्रसंग निकाल्दै थापाले भने, ‘ललिता निवास प्रकरणमा नीतिगत निर्णय गर्नेहरूलाई पनि छानबिन गर्न सर्वोच्चले आदेश दिएपछि त्यसको प्रतिक्रियामा भट्टराईको यस्तो भनाइ आयो।’

नेताहरूका नाम कुनै काण्डमा जोडिनेबित्तिकै शीर्ष नेताहरूले यस्ता कुरा बताउने गरेको थापाको भनाइ छ। ‘कुनै एक काण्डमा शीर्ष नेताका नाम जोडियो भने ए मेरो मात्र छानबिन गर्ने तिम्रो नाम जोडिएको काण्ड के हुन्छ भनेर भन्ने गरिएको छ,’ उनले भने, ‘यसरी आफ्नो अनुकूलतामा कुनै काण्डको फाइल खोल्ने वा खोल्नुपर्छ भनेर माग गर्ने यस्तो अवस्था बदल्नुपर्छ।’