काठमाडौं १८ साउन । नेकपा माओवादी केन्द्रका केन्द्रीय सदस्य धनीराम यादवले पार्टी केन्द्रीय कार्यालय पेरिसडाँडा सम्पर्क कार्यालय र बालुवाटार र खुमलटार केन्द्रीय कार्यालयजस्तो भएको व्यंग्य गरेका तन् ।
बिहीबार जारी केन्द्रीय कमिटी बैठक बोल्दै यादवले नेताहरूले छोराछोरीलाइ पिए राख्न नहुने धारणा राखे । नेताहरूका छोराछोरीलाई जयजयकार गर्नुपर्ने अवस्था आएको भन्दै दुःख व्यक्त गरे।
बैठकमा बोल्दै वरिष्ठ उपाध्यक्ष एवम् गृहमन्त्री नारायणकाजी श्रेष्ठले पार्टीभित्र रूपान्तरणको आवश्यकता रहेको औंल्याएका छन्।

माओवादी केन्द्रको बिहीबार जारी केन्द्रीय कमिटी बैठकलाई सम्बोधन गर्दै श्रेष्ठले स्वाधीनता, परिवर्तनको रक्षा, समृद्धि, शान्ति प्रक्रिया, समाजवादमा लैजानुपर्ने अहिलेको मुख्य कार्यभार रहेको पनि बताए।

संगठनात्मक यथास्थितिवादको अन्त्य गर्नुपर्ने बताउँदै श्रेष्ठले नेतृत्व कमजोर भयो भने रूपान्तरण नहुने दृष्टिकोण राखे। उनले अध्यक्ष प्रचण्डको प्रतिवेदनमा आफ्नो पूर्ण समर्थन रहेको र बैठकपछि पूर्ण प्रतिवेदन आउने जानकारी पनि दिए।

केन्द्रीय सदस्य हितबहादुर तामाङले पार्टी नेताहरूले चुनाव जित्न पैसामात्रै सम्झिने आदर्श बिर्सिने प्रवृत्ति बढिरहेको भन्दै त्यसको समीक्षा हुनुपर्ने बताए। उनले आफ्नो र अर्को नभनी विगतको निर्मम समीक्षा गर्नुपर्ने बताए।

केन्द्रीय सदस्य माधव सापकोटाले नेतृत्वको बीचमा मात्रै कार्यविभाजन भएर पार्टी नचल्ने बताए। उनले माओवादी पार्टी क्रान्तिकारी हो कि यथास्थितिबादी भनेर प्रश्न गरेका थिए।

हरि अधिकारीले विधान संसोधन गर्न सजिलो भए पनि लागु गर्न गाह्रो हुने टिप्पणी गरे।