काठमाडौं १५ साउन । प्रधानमन्त्री पुष्पकमल दाहाल प्रचण्डले टीआरसी विधेयकलाई प्राथमिकता दिएर अगाडि बढाउन सहयोग गर्न नेताहरूसँग आग्रह गरेका छन् ।
सोमबार बिहान नेकपा माओवादी केन्द्रका सचेतक हितराज पाण्डे, एमालेका पदम गिरि र राष्ट्रिय स्वतन्त्र पार्टीका प्रमुख सचेतक सन्तोष परियार लगायतका अन्य दलका सचेतकहरूसँग प्रधानमन्त्री प्रचण्डले सो आग्रह गरेका हुन् ।
संक्रमणकालीन न्यायसँग जोडिएका विषयहरूलाई सरकारले प्राथमिकतामा राखेको भन्दै प्रधानमन्त्रीले सो विषयमा चासो राखेको बताए ।
कानून, न्याय तथा मानव अधिकार समिति सदस्य समेत रहेका परियारले कानून उपसमिति बनाएर छलफल सकिएको र अहिले प्रतिवेदन लेख्ने काम भइरहेको जानकारी प्रचण्डलाई गराएको बताए ।
यस्तै भेटमा संसदको प्रभावकारिता, गतिरोध अन्त्य गर्ने र संसदीय समितिहरूमा सभापति चयनको विषयमा पनि प्रधानमन्त्री ध्यानाकर्षण गराएको उनले बताए ।
प्रचण्डले अन्य दलहरूसँग पनि आफू छलफलमा रहेकाले केहीदिनभित्र नै समितिहरूले पूर्णता पाउने आश्वासन दिएको उनले जनाए ।
सोमबार नै प्रधानमन्त्री प्रचण्ड र नेकपा एमालेका अध्यक्ष केपी ओलीबीच पनि छलफल भएको थियो ।
प्रतिक्रिया दिनुहोस्