काठमाडौं १३ साउन । काठमाडौं महानगरपालिकाले हालै संचालनमा आएको कमलादीस्थित स्काई वाक टावरमाथि छानविन गर्ने भएको छ । महानगरपालिकाले स्काईवाक टावरमा प्रयोग गरिएका सामग्रीको गुणस्तर, संरचनाको वैधानिकता, शुल्कलगायतमा छानविन गर्न लागेको हो ।

दक्षिण एशियाकै अग्लो भन्दै गलत दावी गरिएको उक्त स्काईवाक टावर ७८.५ मिटर अग्लो छ । यो टावर निर्माण सम्पन्न भई पुर्ण रुपमा संचालनमा आएपछि प्रतिव्यक्ति १ हजार रुपैयाँ तिरेर टावर चढ्न पाउने व्यवस्था गरिएको छ । असार १५ देखि टावरले पूर्णता नपाउँदै सञ्चालनमा आइसकेको छ । तर, यो टावरमा प्रयोग भएका सामग्रीको गुणस्तर, नक्सार, पार्किङलगायत संरचना भएनभएको कुरालाई ध्यानमा राखेर छानविन गर्न लागिएको महानगरपालिकाका प्रवक्ता नविन मानन्धरले जानकारी दिए ।

यो टावर वन्डर्स नेपाल प्रालिले निर्माण गरेको हो । २२ तलासम्म निर्माण गरिएको उक्त टावरमा दुई ओटा लिफ्ट, एमपी थिएटरलगायतका सुविधा हुने भनिएपनि अहिले भने भद्रगोल अवस्थमा नै चलाइएको छ ।