काठमाडौं २१ माघ । प्रेस चौतारी नेपालका अध्यक्ष गणेश बस्नेत र उनका दाजु पत्रकार खडगबहादुर बस्नेतले आफ्नो स्वर्गीय हजुरआमा पदमलक्ष्मी बस्नेत र आमा सावित्री बस्नेतको नाममा पत्रकारिता पुरस्कार स्थापनाको गरेका छन । प्रेस चौतारी नेपालको २० औं स्थापना दिवसको अवसरमा बस्नेत दाजुभाईले ११ हजार १ सय ११ रुपैया रासीको ‘पदमलक्ष्मी सावित्री बस्नेत पत्रकारिता पुरस्कार’ घोषणा गरेका हुन् ।

जन्मदिने आमा र कर्म दिने अजुर आमाको नाममा स्थापित सो पुरस्कार प्रेस चौतारी नेपालको तर्फबाट हरेक बर्ष दिने र सो पुरस्कार रासी आफूहरुले बेहोर्ने अध्यक्ष बस्नेतले घोषणा गरे । दुधे अवस्थामै आमा गुमाएका बस्नेत दाजुभाईले हजुर आमा र आमाको सम्मानमा पुरस्कार स्थापना गरेको बताए ।

प्रेस चौतारीले यसअघि नै हृदयचन्द्र सिंह प्रधान पत्रकारिता पुरस्कार, अग्निशिखा पत्रकारिता पुरसकार, बीरेन्द्रकुमार साह त्रियाशल युवा पत्रकारिता पुरसकार र डेकेन्द्र थापा पत्रकारिता पुरस्कार स्थापना गरी प्रत्येक बर्षप्रदान गर्दै आएको छ । पछिल्लो पुरस्कारसंगै चौतारीका तर्फबाट यो पांचौ पुरस्कार भएको छ ।

छ पत्रकार पुरस्कार प्रदान

प्रेस चौतारी नेपालको २०औँ स्थापना दिवसका अवसरमा आज विभिन्न पुरस्कार वितरण गरिएको छ । यहाँ आज आयोजित कार्यक्रममा एमाले उपाध्यक्ष गौतमले ती पुरस्कार वितरण गर्नुभएको हो । ‘हृदयचन्द्रसिंह पत्रकारिता पुरस्कार’ कृष्णमुरारी भण्डारी र ‘अग्निशिखा पत्रकारिता पुरस्कार’ रघु मैनालीलाई प्रदान गरिएको छ । दुवैको राशि रु १५ हजार रहेको छ ।

त्यसैगरी ‘डेकेन्द्र थापा स्मृति पत्रकारिता पुरस्कार’ धनकुटाका सिद्धराज राई र नेपालगञ्जका जनक नेपाललाई प्रदान गरिएको छ ।यस्तै ‘वीरेन्द्रकुमार साह क्रियाशील पुरस्कार’ दोलखाका मन्दिरा थापा र पर्साका भूषण यादवलाई प्रदान गरिएको छ । पुरस्कारको राशि रु पाँच हजार रहेको छ । पुरस्कृतलाई उपाध्यक्ष गौतमले प्रशंसापत्र र दोसल्ला ओढाउनुभएको थियो ।