काठमाडौं, २० माघ । आइतबार हुन लागेको २ नम्बर प्रदेशको प्रदेशसभा बैठकको तयारीका लागि दलहरु आन्तरिक छलफलमा जुटेका छन् । अरु प्रदेशमा वाम गठबन्धनको बहुमत भए पनि २ नम्बर प्रदेशमा भने संघीय समाजावादी फोरम र राष्ट्रिय जनता पार्टी मिलेर सरकार बनाउने अवस्था छ।

२ नम्बर प्रदेशमा बहुमतमा रहेको फोरम र राजपा आइतबारदेखि सुरु हुने प्रदेसभा अधिवेशनको लागि संसदीय दलको नेता र मुख्यमन्त्री छनोटका लागि आन्तरिक छलफलमा जुटेका छन् ।

यस प्रदेशको एक सय सात सदस्यीय प्रदेशसभामा फोरमका २९ र राजपाका २५ जना सांसद छन् । फोरमको संसदीय दलको नेता छनोटका लागि जनकरपुस्थित विराट चोकमा बिहान ११ भरहेको पार्टी कार्यालयमा बैठक बसिरहेको छ भने राजपाको सिद्धार्थ होटलमा १० बजेदेखि बैठक चलिरहेको छ ।

प्रतिनिधिसभा र प्रदेशसभामा चुनावी तालमेल गरेका दुई दलबीच मुख्यमन्त्री फोरम र सभामुख राजपाले लिने सहमति भएको छ । दुवै दलको जारी बैठकले छनोट गर्ने संसदीय दलको नेता नै मुख्यमन्त्री र सभामुखको उम्मेदवार हुनेछन् ।

फोरमको जारी बैठकमा संसदीय दलको नेताका लागि तीन जनाको नाम प्रमुखताका साथ उठाएको छ । बैठकमा दलको नेताका लागि विजय यादव, लालबाबु यादव र सैलेन्द्र शाहको नाममा छलफल भइरहेको छ ।

स्रोतका अनुसार विजय यादवलाई संसदीय दलको नेता बनाएर मुख्यमन्त्रीको उम्मेद्वार बनाउने संभावना प्रवल छ । उनी पार्टीको कोषाअध्यक्ष र झलनाथ खनाल प्रधानमन्त्री हुँदाका आपूर्तिमन्त्री समेत भइसकेकाले मुख्यमन्त्रीका प्रबल दाबेदारका रुपमा देखिएका हुन् । यादव पहिलो संविधानसभामा सिराह–२ बाट निर्वाचित भएका थिए ।

उनलाई अध्यक्ष उपेन्द्र यादवको समेत सद्भाव रहेको छ । त्यस्तै उपाध्यक्ष लालबाबु यादव र सैलेन्द्र शाहलाई पनि बलियो उम्मेदवारका रुपमा हेरिएको छ ।

त्यस्तै राजपाको जारी सांसदहरुको बैठकमा पनि संसदीय दलको नेता वा सभामुखको उम्मेदवारका रुपमा जितेन्द्र सोनल, रामनरेश यादव र मनिष सुमनमध्ये एकजनालाई बनाउने गरी छलफल भइरहेको छ।

दुई नम्बर प्रदेशमा एमालेको २१, कांग्रेसको १९, माओवादी केन्द्रको ११ र संघीय समाजवादी नेपाल पार्टीको एक सिट रहेको छ । यी दलले पनि प्रदेशसभाको अधिवेशनका लागि आन्तरिक तयारी गरिरहेका छन् ।