काठमाडौं, १९ माघ । राष्ट्रिय खेलकुद परिषद्ले तराईका १० जिल्लामा राष्ट्रपती युवा महिला उद्यम कार्यक्रम सञ्चालन गर्ने भएको छ ।

बाँकेको नेपालगन्जमा शुक्रबार भएको एक कार्यक्रममा बोल्दै परिषद्का कार्यकारी उपाध्यक्ष माधवप्रसाद ढुंगेलले सो जानकारी दिएका हुन् । दोस्रो चौमासिकबाट राष्ट्रपती युवा महिला उद्यम कार्यक्रम सञ्चालन भएर तेस्रो चौमासिकमा समापन हुने उहाँको भनाई रहेको थियो ।

२ नम्बर प्रदेशका सबै जिल्ला तथा कपिलबस्तु र नवलपरासीका जिल्लामा यो कार्यक्रम सञ्चालन गर्न लागिएको कार्यकारी उपाध्यक्ष ढुंगेलले बताउनुभयो ।

मधेश क्षेत्रका महिलाहरुको सिप विकास गर्दै उद्यमी बनाउने यात्राको लागि कार्यक्रम सुरु गर्न लागिएको उहाको दाबी रहेको थियो ।

पहिलो चरणमा मधेशका १० जिल्लामा परिक्षणका रुपमा राष्ट्रपती युवा महिला उद्यम कार्यक्रम सुरु गर्न लािगएको बताउदै कार्यकारी उपाध्यक्ष ढुंगेलले कार्यक्रम सफल भएका अन्य जिल्लामा बिस्तार गरिने बताउनुभयो ।

कार्यक्रममा शैक्षिक योग्यताका प्रमाणपत्र धितो राखेर ऋण लिने व्यवस्था गरिन लागेको समेत जानकारी गराईएको थियो । सहभागिहरुले युवाहरुले झेल्दै आएका समस्या समाधानका लागि एकिकृत संयन्त्र निर्माण गरिनुपर्ने बताएका थिए ।

जिल्ला समन्वय समिति बाँकेका संयोजक हरिकृष्ण ज्ञवालीको अध्यक्षतामा भएको कार्यक्रममा खेलकुद मन्त्रालयका उपसचिव जनार्धन रिजाल, जिल्ला युवा समिति बाँकेका कार्यालय प्रमुख रामसुरेस यादव लगायतको सहभागिता रहेको थियो ।