काठमाडौं २७ बैशाख । नेपाली कांग्रेस पदाधिकारी बैठकले नक्कली शरणार्थी प्रकरणमा पक्राउ परेका पूर्वगृहमन्त्री बालकृष्ण खाणको विषयमा कुनै निर्णय लिएन । पार्टी प्रवक्ता डा। प्रकाशशरण महतले आजको वैठक भ्रातृ संगठन र विभाग गठनको विषयमा केन्द्रित रहेको बताए ।

बैठकपछि पत्रकारले खाणको विषयमा के निर्णय भयो भनि सोधेका थियो । डा.महतले अहिले अनुसन्धानकै क्रममा भएकाले कांग्रेसले हतार नगर्ने बताए ।

‘टोपबहादुर रायमाझी त पूर्जी काटिएपछि फरार हुनुभयो । बालकृष्णजी त्यसरी भाग्नुभएको छैन । अनुसन्धानमा सहयोग गर्नुभएको छ । अनुसन्धान परिपक्व होस, अनि पार्टीले निर्णय गर्छ’, उनले भने ।

अनुसन्धान परिपक्व नभइकन अहिले नै निष्कर्षमा पुगेर पार्टीले दोषी करार नगर्ने डा. महतले बताए ।
करिब ३ घन्टा बसेको वैठकमा पूर्वगृहमन्त्री तथा पार्टीका नेता बालकृष्ण खाणको बारेमा छलफल भएको थियो ।

वैठकपछि नेताहरुले पत्रकारलाई प्रतिक्रिया दिन चाहेनन् । खाणलाई निलम्बन गर्ने विषयमा छलफल भएको बैठकमा सहभागी एक पदाधिकारीले जानकारी दिए ।

ती पदाधिकारीका अनुसार भोलि फेरि पदाधिकारी र पूर्वपदाधिकारीको वैठक बस्ने सल्लाह भएको छ । भोलिको वैठकले निलम्बनका बारेमा निर्णय लिने उनले बताए ।