काठमाडौं २३ बैशाख । प्रधानमन्त्री पुष्पकमल दाहाल प्रचण्डले नक्कली भुटानी शरणार्थी प्रकरणमा तानिएकाहरूलाई कानुन, विधि र प्रक्रियाअनुसार कारबाही हुने दाबी गरेका छन्।

शनिबार सिंहदरबारमा नेकपा एमालेका अध्यक्ष केपी शर्मा ओलीसँगको २ घन्टा लामो छलफलपछि सञ्चारकर्मीसँगको कुराकानीका क्रममा प्रधानमन्त्री प्रचण्डले कारबाहीबाट सरकार तलमाथि नहुने बताएका हुन् ।

एमाले अध्यक्ष ओलीले यसअघि र आजको दुवै भेटमा यस प्रकरणबारे चासो राखेको पनि जानकारी दिए।

‘अस्ति पनि र आज पनि यो विषयमा उहाँले कर्न्सन राख्नुभयो। मैले जनरल कुरा राखेको छु,’ प्रधानमन्त्रीले भने।

ओलीसँगको भेटपछि सञ्चारकर्मीसँग प्रधानमन्त्री प्रचण्डको सवाल–जवाफः

भुटानी शरणार्थीबारे के कुरा भयो ?
प्रक्रिया, पद्धति र ऐन अनुसार दृढताका साथ अगाडि जान्छ। दोषी कोही नछुटुन, निर्दोष कोही नपरुन भन्ने मान्यताबाट बोल्डले अगाडि गइन्छ।

तपाईंलाई अध्यक्ष ओलीले के भन्नुभयो ?
अस्ति पनि र आज पनि यो विषयमा उहाँले कर्न्सन राख्नुभयो। मैले जनरल कुरा राखेको छु।

टोपबहादुर र रामबहादुरहरुलाई बचाइदिउँ भन्न आउनुभएको हो ?
त्यस्तो भनेर बचाउँ भनेर कसैले नि सक्दैन नि।

तपाईं दबाबमा त पर्नुहुन्न ?
पर्दिन, पर्दिन। म दबाबमा पर्दिँन।

सिंहदरबारमा प्रधानमन्त्रीसँगको भेटपछि सञ्चारकर्मीसँग ओलीको सवाल–जवाफः

पूर्वमन्त्री भइसकेको मान्छे हराउँछन् र भन्नुभएको थियो, उहाँ कहाँ हराइरहनुभएको छ?
त्यो तपाईंहरुले बुझ्नु न।
तपाईंको सम्पर्कमा हुनुहुन्छ होला नि?
मैरो सम्पर्कमा हुनुहुन्न।
कहिले आउनुहुन्छ उहाँ?
सोध्नुस न, उहाँलाई नै।
तपाईं अभियुक्तलाई बचाउन लाग्नुभयो भन्ने आरोप छ, के भन्नुहुन्छ?
तपाईंहरूलाई विश्वास लाग्यो। त्यस्तो कुरा।
त्यो आरोप छ भनेको?
केही यस्ता खालका मान्छेहरू छन्, घुस र बेइमानीमा भर पर्ने त्यस्ता खालका मान्छेहरूले हल्ला चलाउँछन्।