जनकपुर १६ बैशाख । उपप्रधान तथा गृहमन्त्री नारायणकाजी श्रेष्ठले मिटरब्याजपीडितको पक्षमा सरकार रहेको जनाउँदै कहीँ कतैबाट मिटरब्याजीको पक्षपोषण नलाग्न कार्यकर्तालाई आग्रह गरेका छन् ।

वाग्मती नगरपालिकाले आयोजना गरेको नमुना पहरी बस्ती हस्तान्तरण कार्यक्रममा सहभागी हुन सर्लाही आइपुगेका नेता श्रेष्ठले मिटरब्याजीका लागि सरकार कठोर रहेको जनाउँदै मिटरब्याजीको पक्षमा नलाग्न कार्यकर्ताहरुलाई आग्रह गरेका हुन् ।

माओवादी केन्द्रका वरिष्ठ उपाध्यक्षसमेत रहेका श्रेष्ठले मिटरब्याजीको पक्षमा लागेको खबर पाए कार्यकर्तालाई कारबाहीसमेत गर्ने चेतावनी दिए । नेता श्रेष्ठले सर्लाहीमा मिटरब्याजीको जालो फैलिएको उल्लेख गर्दै राजनीतिक पहुँचको आधारमा कुनै पनि मिटरब्याजीले उन्मुक्ति नपाउने बताए ।

‘पार्टीको सक्रिय कार्यकर्ता भए पनि मिटरब्याजीको पक्षमा रहेको जानकारी पाए हामी कारबाही गर्छौं, त्यसकारण तपाईंहरु मिटरब्याजीको पक्षमा नलाग्नुस्,’ उनले भने, ‘मिटरब्याजको चंगुलमा यो जिल्ला परेको छ, पीडितलाई न्याय दिलाउन हाम्रो पहल हुनेछ ।’ उनले मधेश प्रदेशमा मिटरब्याजको जालो रहेको भन्दै जनकपुरमा मिटरब्याज जाँचबुझ आयोगको कार्यालय नै स्थापना गरेर मिटरब्याजको सम्बन्धमा थप अनुसन्धान र कारबाही अघि बढाइने जानकारी दिए ।

मिटब्याजको विरुद्ध आवाज उठाउँदै आएका तत्कालीन नेकपाका केन्द्रीय सदस्य तथा सर्लाही जिल्ला इन्चार्ज डाचाराज वाग्लेको शंकास्पद मृत्यु भएको स्मरण गर्दै मन्त्री श्रेष्ठले वाग्लेको हत्या भएको आशंका व्यक्त गरे । उनले वाग्ले घटनामा केन्द्रीय अनुसन्धान ब्युरोले अनुसन्धान गरिरहेको जानकारी दिए ।

गृहमन्त्री श्रेष्ठले पीडामा परेका नागरिक तथा समस्या बोकेर आउने नागरिकको पक्षमा काम गर्न स्थानीय प्रहरी प्रशासनलाई निर्देशन दिए । उनले भ्रष्टाचार नियन्त्रणका लागि वर्तमान सरकार शून्य सहनशीलताको सिद्धान्त अघि बढेको जनाउँदै मातहतका निकायले सोहीअनुसार काम गर्न गराउन निर्देशन दिए ।

वाग्मती नगरपालिका–११ मा नगरले लोपोन्मुख जाति पहरीका १३ परिवारका लागि १ करोड ५३ लाख रुपैयाँबराबरको लागतमा निर्माण गरिएको पक्की घरको साँचो गृहमन्त्री श्रेष्ठले हस्तान्तरण गरे । वाग्मती नदी किनारमा असुरक्षित बसोबास गरिरहेका पहरी जातिका कुल ७० जना व्यक्ति शनिबारबाट पक्की घरमा सरेका छन् । फुसको छाप्रोमा बस्दै आएका पहरी समुदायले पक्की घर पाएपछि दंग परेका छन् ।