काठमाडौं ९ वैशाख । तनहुँ १ मा हुने उप निर्वाचनमा नेकपा एमाले र राष्ट्रिय स्वतन्त्र पार्टीबीच “हार्दिक सहकार्य” को सहमति भएको छ ।
रास्वपा उम्मेदवार डा।स्वर्णिम वाग्ले शनिबार एमालको जिल्ला पार्टी कार्यालयमै छलफलका लागि पुगेका थिए । छलफलमा एमाले र रास्वपाबीच एकले अर्कालाई “डिस्टर्व” नगर्ने सहमति भएको बताइन्छ । जसले जितेपनि कांग्रेस हराउन उप निर्वाचनको मतदान केन्द्रमै संयुक्त परिचालन हुने सहमति दुई पार्टीबीच भएको हो ।

सहमति अनुसार कांग्रेस र एमालेबीच तीव्र प्रतिस्पर्धा ‍भएका पहाडी बुथहरुमा रास्वपाले एमालेकै चिनिएका कार्यकर्ताहरुलाई बुथ प्रतिनिधिको रुपमा खटाएको छ ।

“मतदान केन्द्रमा रास्वपाले बुझाएको बुथ एजेण्टहरु अधिकाशं एमाले कार्यकर्ता छन् । रास्वपा र एमालेबीच सहकार्य भएको छ”, तनहुँका एमालेनिकट एक पत्रकारले भने । रास्वपाले पहाडी बुथहरु एमालेलाई छाड्नु कांग्रेसका गोविन्द भट्टराईलाई जसरी पनि हराउने रणनीति अनुसार भएको उनको दावी छ ।

चुनावी परिणाम कांग्रेसको पक्षमा आउन नुहने भन्दै स्वर्णिमले आफू हारे पनि एमाले जित्नु पर्ने प्रस्ताव गरेका छन् भने एमालेले पनि आफूले हार्ने अवस्था भएमा घण्टीले जित्नु पर्ने निश्कर्षमा पुगेका छन् ।