नयाँदिल्ली, २८ चैत । अरबिन्द केजरीवाल नेतृत्वको आम आदमी पार्टी (आप)ले राष्ट्रिय दलको मान्यता पाएको छ । भारतको निर्वाचन आयोगले आम आदमी पार्टीलाई राष्ट्रिय दलको मान्यता दिएको हो ।

आफू नेतृत्वको पार्टीले राष्ट्रिय दलको मान्यता पाएपछि नयाँदिल्लीका मुख्यमन्त्री केजरीवालले खुसी व्यक्त गर्दै बधाई साटासाट गरेका छन् । ‘यति छोटो समयमा नै राष्ट्रिय पार्टी ? यो कुनै चमत्कारभन्दा कम छैन । सबैलाई धेरैधेरै बधाई,’ उनले ट्विटरमार्फत खुसी व्यक्त गरेका छन् ।

भारतीय सञ्चार माध्यमका अनुसार गुजरातको चुनावपछि राष्ट्रिय दलको मान्यताका लागि दाबी गरेको भएपनि निर्वाचन आयोगले सो बारेमा कुनै निर्णय नलिएपछि सो पार्टी अदालतको ढोकामा पुगेको थियो ।

कर्नाटक संयोजक पृथ्वी रेड्डीले कर्नाटक उच्च अदालतमा गरेको रिटमा सुनवाइ गर्दै सो अदालतले उपयुक्त निर्णय लिन आयोगलाई निर्देशन दिएको थियो । सो निर्देशनपछि आम आदमी पार्टीले राष्ट्रिय दलको मान्यता पाएको जनाइएको छ ।