काठमाडौं ३१ वैशाख ।अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच बिहीबार चीनको राजधानी बेइजिङमा उच्चस्तरीय भेटवार्ता भएको छ।

बेइजिङस्थित ग्रेट हल अफ द पिपलमा ट्रम्पलाई स्वागत गर्दै राष्ट्रपति सीले अमेरिका–चीन सम्बन्ध विश्वव्यापी स्थिरताका लागि महत्त्वपूर्ण रहेको उल्लेख गरे।

उनले दुई देशबीच प्रतिस्पर्धाभन्दा सहकार्य आवश्यक रहेको बताउँदै भने, “अमेरिका र चीन प्रतिद्वन्द्वी होइन, साझेदार बन्नुपर्छ।”

भेटका क्रममा दुई नेताले हात मिलाएका थिए भने ट्रम्पलाई चिनियाँ पक्षले गार्ड अफ अनरसमेत प्रदान गरेको थियो। त्यसपछि दुवै नेताबीच औपचारिक द्विपक्षीय वार्ता सुरु भएको थियो।

जवाफमा ट्रम्पले सी चिनफिङको प्रशंसा गर्दै आफूलाई उनको मित्र हुन पाउँदा सम्मानित महसुस भएको बताए। उनले अमेरिका–चीन सम्बन्ध अझ सकारात्मक दिशातर्फ अघि बढ्ने विश्वाससमेत व्यक्त गरे।

ट्रम्पले भने, “विश्वका केही प्रमुख व्यापारिक नेताहरूलाई मसँगै चीन ल्याएको छु।”

ट्रम्पको प्रतिनिधिमण्डलमा इलोन मस्क, एप्पलका प्रमुख कार्यकारी अधिकृत टिम कुक तथा बोइङका अधिकारीलगायत अमेरिकी व्यवसायिक क्षेत्रका प्रभावशाली व्यक्तित्व सहभागी छन्।

वार्तामा व्यापार, भन्सार शुल्क, अर्धचालक प्रविधि, कृत्रिम बुद्धिमत्ता (एआई), दुर्लभ पृथ्वी खनिज तथा ताइवानसँग सम्बन्धित विषयमा गम्भीर छलफल हुने अपेक्षा गरिएको अन्तर्राष्ट्रिय सञ्चारमाध्यमहरूले जनाएका छन्।