मुगु, १७ चैत । हिमाली जिल्ला मुगुमा एक सामुदायिक विद्यालयमा पाँच दिनकी सुत्केरी महिलाले एसइई परीक्षा दिएकी छन् । उनले शुक्रबारदेखि सुरु भएको माध्यमिक शिक्षा परिक्षा (एसइई)मा पहिलो दिन अंग्रेजी विषयको परीक्षा दिएकी हुन् ।
त्यसरी परीक्षा दिनेमा छायाँनाथ रारा नगरपालिका–१३ मा रहेको प्रकाश मावि लुममा अध्ययनरत छात्रा देवमाया बोहोरा छन् । ५ दिने सुत्केरी महिलाले एसइई परीक्षा दिइरहेकी हुन् । बोहोराले छोरालाई जन्म दिएकी छन् ।
उनले सदरमुकाम गमगढी बजारमा रहेको महाकाली नमुना माध्यमिक विद्यालयको परीक्षा केन्द्रबाट एसइई परीक्षा दिइरहेकी छन् ।
उनले सुत्केरी भएदेखि आफूले राम्ररी आरामसमेत गर्न नपाएको बताएकी छन् । एसइई नजिक आएको र गर्भवती भएकाले परीक्षाको तयारी पनि राम्रो नरहेको उनले दुखेसो पोखिन् ।
उनले परीक्षामा लामो समय बिताउँदा पाँच दिनको दुधे बालक भोकाउने भए पनि जोखिम मोलेरै भविष्य निर्माणका लागि परीक्षा केन्द्र पुगेर परीक्षामा सहभागी भएको बताइन् ।
महाकाली माध्यमिक विद्यालयको परीक्षा केन्द्रका केन्द्राध्यक्ष खड्ग बहादुर रोकायाले शिक्षा नियमावलीमा सुत्केरी महिलालाई एसइई परीक्षामा समय थप्नुपर्ने कुनै व्यवस्था नभए पनि व्यवहारिकता हेरेर १५ मिनेट थप गरिएको बताए ।
प्रतिक्रिया दिनुहोस्