काठमाडौं । नेपाल बार एसोसिएसनले शान्ति प्रक्रियालाई निष्कर्षमा पुर्याउन र पीडितलाई न्याय प्रदान गर्न नेपाल सरकार र गठित आयोगहरू जिम्मेवार हुन जरूरी रहेको बताएको छ।
मंगलबार एसोसिएसनका महासचिव अधिवक्ता अन्जिता खनाल र अध्यक्ष वरिष्ठ अधिवक्ता गोपालकृष्ण घिमिरेले विज्ञप्ति जारी गर्दै यसमा सरकार र गठित आयोगहरू नै जिम्मेवार हुन जरूरी रहेको बताएको हो।
‘शान्ति प्रक्रियालाई निष्कर्षमा पुर्याउने उद्देश्यले विगतमा भएको विस्तृत शान्ति सम्झौता, नेपालको संविधान तथा गठित सत्य निरूपण तथा मेलमिलाप आयोग र बेपत्ता पारिएका व्यक्तिहरूको छानबिन आयोगको काम, कर्तव्य र क्षेत्राधिकार उल्लेख भई दुबै आयोगहरूले आफ्नो क्षेत्राधिकार अन्तर्गतका कार्य गर्दै आइरहेको अवस्थामा शान्ति प्रक्रियालाई तार्किक निष्कर्षमा पुर्याउने र पीडितलाई उचित न्याय प्रदान गर्न नेपाल सरकार र गठित आयोगहरू नै जिम्मेवार हुन जरूरी छ,’ विज्ञप्तिमा भनिएको छ।
यस्तै यस विषयलाई लिएर विवाद सिर्जना हुनेगरी भ्रमपूर्ण अभिव्यक्तिहरू प्रकाशित भएको भन्दै ध्यानाकर्षण भएको पनि जनाएको छ। ती निकायहरूलाई प्रभावित हुनेगरी यस्ता गतिविधि नगर्न, नगराउन पनि एसोसिएसनले आह्वान गरेको छ।
प्रतिक्रिया दिनुहोस्