खोटाङ, १२ फागुन ।खोटाङको प्रमुख व्यापारिक केन्द्र दिक्तेल बजारदेखि अल्छेढुंगाबाट दोर्पाको दुम्ली हुँदै साकेला गाउँपालिकाको केन्द्र मानेभञ्ज्याङसम्म नियमितरुपमा बस सेवा सञ्चालनमा आएको छ । गाउँपालिकासँगको सहकार्यमा खोटाङ यातायात प्रालिले बिहीबारदेखि बस सेवा सञ्चालन गरेको हो ।

झण्डै ३९ किलोमिटर लामो सडकखण्डमा नियमित बस सञ्चालन भएपछि भाडादरसमेत कायम गरिएको छ । साकेला गाउँपालिका–२ रतन्छाको सुर्के सिलापाबाट दिक्तेलसम्म पाँच सय, यातिम्छाचोकबाट दिक्तेलसम्म चार सय ५० तथा यातिम्छाचोक, पिनालाखा र साल्मेबाट दिक्तेलसम्म चार सय भाडादर कायम गरिएको छ ।

यस्तै, लामदुवाली–दिक्तेल तीन सय ७०, चम्पा–दिक्तेल तीन सय ५०, चिउरीडाँडा–दिक्तेल तीन सय, दुम्ली–दिक्तेल दुई सय ६०, रुवाबु–दिक्तेल दुई सय ४०, च्यानडाँडा–दिक्तेल एक सय ८० र मोहोरिया–दिक्तेल एक सय ३० भाडादर कायम गरिएको छ । दिक्तेलबाट रतन्छासम्म समान ढुवानी गर्न १० किलोसम्म निःशुल्क र सोभन्दा माथि भएमा प्रतिकिलो चारका दरले भाडा लाग्ने खोटाङ यातायात प्रालिका महासचिव रामकुमार हिङमाङले बताए ।