काठमाडौँ, १० फागुन । राष्ट्रपति निर्वाचनका लागि शीर्ष नेताहरु तीब्र दौडधुपमा छन् । प्रधानमन्त्री पुष्पकमल दाहाल प्रचण्डलाई भेट्न नेकपा एमालेका अध्यक्ष केपी शर्मा ओली बालुवाटार  जाँदैछन्  । त्यस्तै, प्रधानमन्त्रीलाई भेट्न सत्ता साझेदार दल राष्ट्रिय स्वतन्त्र पार्टी (रास्वपा) का अध्यक्ष रवि लामिछाने र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन पनि बालुवाटार जाने कार्यक्रम छ ।
त्यसैगरि, लोकतान्त्रिक समाजवादी पार्टी (लोसपा)का नेताहरूले नेपाली कांग्रेस सभापति शेरबहादुर देउवालाई भेट्दै छन् । सभापति देउवालाई भेट्न लोसपा नेताहरु धुम्बाराही जाने भएका हुन । लोसपा नेता केशव झाका अनुसार पार्टी अध्यक्ष महन्थ ठाकुरलाई राष्ट्रपति बनाउने मागसहित कांग्रेस सभापति देउवालाई भेट गर्न लागिएको हो । यसअघि मंगलबार मात्रै प्रधानमन्त्री पुष्पकमल दाहाल ‘प्रचण्ड’ र नेकपा एमाले अध्यक्ष केपी शर्मा ओलीलाई भेटेर सोही प्रस्ताव गरेको थिए ।
संसद्को ठूलो दल नेपाली कांग्रेस, दोस्रो दल नेकपा एमालेसहित एकीकृत समाजवादी र लोकतान्त्रिक समाजवादी पार्टीबाट राष्ट्रपतिको उम्मेदवार बन्न सक्ने गरी छलफल अघि बढाएका छन् । सत्ताको नेतृत्व गरिरहेको माओवादीले राष्ट्रपतिमा राष्ट्रिय सहमति हुनुपर्ने बताउँदै आएको छ । एमालेले गएको पुस १० गते एमाले र माओवादी केन्द्रका शीर्ष नेताबीच भएको भद्र सहमतिमा प्रधानमन्त्री माओवादी केन्द्रलाई र राष्ट्रपति एमालेलाई दिने समझदारी भएको एमाले नेताहरुको दाबी छ । कांग्रेस भने विगतको पाँच दलीय गठबन्धन ब्युँताएर राष्ट्रपति आफूले लिन प्रयासरत छ ।
फागुन २५ गते हुने राष्ट्रपति निर्वाचनका लागि फागुन १३ गते राष्ट्रपतिको उम्मेदवारी मनोनयन गर्ने कार्यतालिका छ ।