गण्डकी, १६ माघ । गण्डकी प्रदेश प्रमुख पृथ्वीमान गुरुङले सहिदको बलिदानबाट नेपाल स्वतन्त्र, सार्वभौम, अखण्ड, स्वाधीन र स्वाभिमानी राष्ट्र बनेको बताएका छन् ।

सहिद दिवस, २०७९ का अवसरमा शुभकामना सन्देश व्यक्त गर्दै उनले सहिदहरूको त्याग र बलिदानको प्रतिफलस्वरूप प्राप्त उपलब्धिको रक्षा गर्दै सामाजिक न्याय र समानतामा आधारित समुन्नत र आत्मनिर्भर राष्ट्र निर्माण गर्नु हामी सबैको साझा दायित्व भएको उल्लेख गरे ।

नागरिक स्वतन्त्रता, लोकतन्त्रको स्थापना र राष्ट्रियताको रक्षाका लागि अमूल्य जीवन उत्सर्ग गर्ने शुक्रराज शास्त्री, धर्मभक्त माथेमा, दशरथ चन्द, गंगालाल श्रेष्ठलगायत सम्पूर्ण ज्ञात–अज्ञात सहिदप्रति प्रदेश प्रमुख गुरुङले श्रद्धाञ्जलि व्यक्त गरेका छन् ।

सहिद दिवसले हामी सबैलाई नेपाल र नेपालीको हित र अधिकारका लागि सहादत प्राप्त गरेका सहिदहरूको सपना साकार पार्न समर्पित हुन प्रेरणा दिने उल्लेख गर्दै सन्देशमा उनले देशलाई द्रूत आर्थिक विकाससहितको समृद्ध राष्ट्र बनाउने सहिदहरूको सपनालाई साकार पार्नुपर्नेमा जोड दिए ।